Полша Беларус билан чегарада девор қурилишини якунлади

Полша қўшни Беларус билан чегарада девор қурилишини якунлади. Бу ҳақда 30 июнь, пайшанба куни Полша ички ишлар вазири Мариуш Каминский маълум қилди. «Биз ўрнатган тўсиқ Лукашенконинг даҳшатли диктатурасидан ажратиб туради», деди Каминский Кузница чегара ҳудудида. Тўсиқ конструкциясининг баландлиги 5,5 метрни ташкил қилади. Унинг қурилишига қарийб 350 миллион евро сарфланган. Узунлиги 186 километрни ташкил этади - Полша-Беларус чегарасининг ярмидан бироз камроқ.

Полша Ички ишлар вазирлиги раҳбарининг сўзларига кўра, Беларус ҳудудидан кузатилган муҳожирлар оқими «каттароқ сценарийнинг бир қисми, бутун минтақа, бутун Марказий ва Шарқий Европани беқарорлаштириш сценарийси» эди. «Бу Украина билан урушга тайёргарлик эди», - дея қўшимча қилди вазир.

Варшава ҳукумати чегарадаги муҳожирларни Беларусга қайтаришни осонлаштириш учун аввалроқ миллий қонунчиликни ўзгартирган эди. Ҳуқуқ ҳимоячилари ушбу тузатишларни танқид қилиб, улар халқаро ҳуқуққа зид эканлигини, чунки муҳтожларнинг бошпана сўрашига тўсқинлик қилаётганини таъкидладилар.

«Полша одамларнинг Европа иттифоқига қочишига деворлар ва қонунчиликдаги ўзгаришлар орқали тўсқинлик қилар экан, ҳимоя излаётганлар Беларус ҳукмдори Лукашенконинг адолатсиз режимига дучор бўлишади», дея маълум қилди Pro Asyl ташкилоти. «Полша чегарасини кесиб ўтишга муваффақ бўлганлар автоматик равишда қамоққа тушишади», дея қўшимча қилди ҳуқуқ ҳимоячилари.

Полша 2021 йилда Яқин Шарқдан муҳожирлар оқими кескин ошганидан кейин Беларус билан чегарада девор қуришга қарор қилди. Минск бу одамларни Европа иттифоқига кейинчалик жўнатиш мақсадида мамлакатга киритган. Полша ички ишлар вазирининг таъкидлашича, тўсиқ бир неча ҳимоя чизиғидан иборат бўлиб, замонавий электрон қурилмалар, хусусан, ҳаракат датчиклари, шунингдек, кеча-ю кундуз кўриш камералари билан жиҳозланади. Тепага тиканли симларнинг спираллари бириктирилади.

Полша ва Европа иттифоқининг бошқа давлатлари ҳукуматлари Беларус раҳбари Александр Лукашенкони инқирозли ҳудудлардан қочқинларни Европа иттифоқи ташқи чегарасига етказишни ташкиллаштирганликда айблади. 2021 йил май ойи охирида Лукашенко Минск Беларус орқали Европа иттифоқига киришга уринган ноқонуний муҳожирларни қўлга олишни тўхтатгани ҳақида эълон қилди. 

Шундан сўнг, Яқин Шарқ мамлакатларидан Минскка парвозлар сони сезиларли даражада ошди ва Беларус ҳудудидан Европа иттифоқига боришга интилаётган мигрантлар оқими кескин кўпайди. Минскнинг «гибрид ҳужуми»га жавобан ЕИ бешинчи санкциялар пакетини, жумладан, Яқин Шарқдан Беларусга мигрантларни ташийдиган авиакомпанияларга қарши санкцияларни жорий қилди.