«Россияга қарши санкциялар ҳали узоқ вақт сақланиб қолади» - Олаф Шольц

Германия канцлери Олаф Шольц немисларни Россияга нисбатан санкциялар узоқ давом этиши ва бу қийинчиликлар билан бирга кечиши ҳақида огоҳлантирди. Шундай бўлса-да, Россия президенти Владимир Путиннинг «неоколониал» курси ҳар қандай ҳолатда ҳам тўхтатилиши керак, деб ёзади Шольц 17 июль, якшанба куни Frankfurter Allgemeine Zeitung газетаси учун мақоласида. 

«Бизнинг санкцияларимизни узоқ вақт сақлаб қолишимиз кераклиги бошиданоқ маълум бўлган», деб ёзади Германия ҳукумати раҳбари ва агар Россия қўйган шартлар асосида тинчлик ўрнатилса, Путин жазо чораларининг ҳеч бири бекор қилинмаслигини аниқ тушуниши кераклигини таъкидлади.

Канцлер, агар Путиннинг Украинадаги агрессиясига ҳозир жавоб қайтарилмаса, у давом этиши ҳақида огоҳлантирди ва НАТО ҳатто альянс ҳудудида ҳам Россия ҳужуми эҳтимолини истисно қилолмаслигини қайд этди. «Агар Путинга жавобгарликдан қутулишга рухсат берилса, у куч билан қонунни бузиши мумкинлиги ва бу ҳеч қандай оқибатларга олиб келмаслигини тушуниб қолади. Охир-оқибат, бизнинг эркинлигимиз ва хавфсизлигимиз ҳам хавф остида қолади», - дейди Олаф Шольц. 

Германия учун оқибатлар ҳақида гапирар экан, у қўшимча қилди: «Бу йўл, ҳатто бизникидек кучли ва гуллаб-яшнаган давлат учун ҳам осон эмас. Бизга катта сабр-тоқат керак бўлади». Унинг сўзларига кўра, Германияда аксарият фуқаролар аллақачон уруш оқибатларидан, айниқса, бензин ва озиқ-овқат нархининг юқорилигидан азият чекмоқда. Шунинг учун Германия ҳукумати 30 миллиард евролик иккита ёрдам пакети ҳақида қарор қабул қилди, деди Германия канцлери. 

Жаҳон иқтисодиёти ҳозирда «ўнлаб йиллар давомида кўрмаган муаммоларга дуч келмоқда», деди у. Бу таъминот занжирлари узилиб қолиши, хомашё танқислиги ва уруш туфайли энергетика бозорларидаги ноаниқлик билан боғлиқ. Буларнинг барчаси бутун дунёда юқори нархларга олиб келади. «Дунёдаги ҳеч бир давлат бунга қарши тура олмайди», - деб таъкидлайди Шольц FAZ’даги мақоласида. «Биз бирга бўлишимиз ва биргаликда ҳаракат қилишимиз керак», деди у.