Ўш вилоятида айиқ чегарачига ҳужум қилди. Ҳарбий олган жароҳатлари оқибатида вафот этган.
Фожиа 19 июль куни юз берган. Тоғли ҳудудда хизмат вазифасини ўтаётган чегарачига йиртқич қўққисдан ҳужум қилгани айтилмоқда. Қирғизистон давлат хавфсизлик қўмитаси Чегара хизмати хабарига кўра, айиқ билан олишув давомида жароҳат олган 31 яшар ҳарбий шошилинч тиббий ёрдам кўрсатилганига қарамай вафот этган.
Йиртқич ҳужуми қурбони бўлган чегарачи шартнома асосида хизмат қилаётган сержант экани очиқланган. Ҳарбий тузилмалар ҳодиса жойида тергов олиб боришмоқда.
Шу йилнинг апрель ойида Тошкент туманида уйда боқилаётган Африка шери 3 ёшли боланинг боши ва елкасидан тишлаб олиб, саломатлигига жиддий зиён етказганди.
Аввалроқ Ҳиндистонда кетма-кет уч кишининг умрига зомин бўлган йўлбарс умрбод озодликдан маҳрум этилганди. Тожикистон шарқида эса бўрилар икки аёлни ғажиб ташлаганди.
