Ўзбекистон Кобул темирйўл коридорини қуриш лойиҳаси тафсилотларини очиқлади

Инвестициялар ва ташқи савдо вазири ўринбосари Бадриддин Обидов Тошкентда ўтказилган Афғонистонда қатор инфратузилмавий ва гуманитар лойиҳаларни амалга ошириш масалаларига бағишланган халқаро конференциянинг «Иқтисодиёт тикланиши - Афғонистонда тинчлик ва осойишталик мустаҳкам асосидир» шуъба йиғилишида маъруза қилди, деб хабар бермоқда «Дунё».

Сессия доирасида узунлиги 750 км бўлган «Термиз – Мозори-Шариф – Кобул – Пешавор» темирйўлини қуриш лойиҳаси тақдимоти бўлиб ўтди. «Боштранслойиҳа» дастлабки ҳисоб-китобларига кўра, лойиҳа 1200 дан ортиқ сунъий иншоотларни, 100 дан ортиқ туннел ва 336 кўприкни қуришни ўз ичига олади. 

Дастлабки маълумотларга кўра, лойиҳани амалга ошириш умумий қиймати 4,6 миллиард АҚШ долларини ташкил этади. Лойиҳани амалга ошириш нафақат минглаб янги иш ўринлари яратиш, балки афғон жамияти кўплаб ижтимоий-иқтисодий муаммоларини ҳал этиш имконини беради.

Лойиҳа Марказий ва Жанубий Осиё ўртасидаги темирйўл инфратузилмасини боғлайди ва шу билан минтақалар ўзаро боғлиқлигини таъминлайди.