Уммонда Ўзбекистон савдо майдончасини очиш режалаштирилмоқда

Масқат шаҳрида Уммон савдо-саноат палатаси билан ҳамкорлик истиқболлари муҳокама қилинди.

Фото: Dunyo

Ўзбекистоннинг Масқатдаги элчихонаси томонидан Уммон Савдо-саноат палатаси ижрочи директори Ал-Фазал ал-Ҳинаий билан учрашув уюштирилди, деб хабар бермоқда “Дунё”.

Ал-Фазал ал-Ҳинаий мамлакат кенг иқтисодий имкониятларини инобатга олган ҳолда Уммон ишбилармон доиралари вакиллари эътиборини Ўзбекистонга қаратиш борасида кўмак кўрсатишга тайёр эканини маълум қилди.

Ал-Ҳинаий Ўзбекистон товар-хомашё биржаси билан ҳамкорлик ўрнатиш ва мамлакат савдо майдончасини очиш нафақат Уммон билан, балки қўшни Форс кўрфази ва Ғарбий Африка давлатлари билан ҳам савдо-сотиқ муносабатларини кенгайтиришга хизмат қилишини таъкидлади.

Ҳамкорлик дастлабки қадами сифатида икки мамлакат мутахассислари иштирокида онлайн мулоқот ўтказиш ҳамда Уммонда Ўзбекистон маҳсулотлари кўргазмасини ташкил этиш муҳимлиги қайд этилди.

Тайёрлаган: Отабек Матназаров

#Уммон #савдо