Финландия президенти Россияга нисбатан ишонч йўқолганини айтди

Саули Ниинистёнинг қайд этишича, Россия билан барча алоқаларни узиш керак эмас.

Фото: AP

Россия ва Финландия ўртасидаги муносабатлар ўзгарди ва ҳозирча аввалгидек ҳолда тикланиши истиқболи йўқ, деди Финландия президенти Саули Ниинистё.

«Ҳозирда Финландия ва Россия ўртасидаги аввалги муносабатлардан жуда оз нарса қолди. Ишонч йўқолди», — деди у.

Ниинистёнинг қайд этишича, Россия билан барча алоқаларни узиш керак эмас. У мулоқот учун мавзуларни сақлаб қолиш ва Россия ҳукуматининг Украинадаги ҳаракатларини қоралашни мамлакатга нисбатан нафратга айлантирмасликка чақирди.

У шунингдек, Финландия ҳукумати Украинани қанча керак бўлса шунча қўллаб-қувватлашини таъкидлади.

Аввалроқ Финландия россияликларга виза беришни кескин қисқартириши хабар қилинганди.