АҚШ Украинага 3 млрд долларлик янги ҳарбий ёрдам ҳақида эълон қилади

23 август, сешанба куни Америка ҳукуматининг расмий вакили маълум қилишича, Қўшма Штатлар Украинага қарийб 3 миллиард доллар миқдоридаги янги ҳарбий ёрдамни эълон қилади. Бу урушнинг бутун олти ойида Киевга кўрсатилган энг йирик ҳарбий ёрдам пакети бўлади.

У 24 августда нишонланадиган Украинанинг Мустақиллик кунига бағишланган. У Украина хавфсизлигига кўмаклашиш ташаббусига (USAI) Конгресс ажратган маблағлардан берилади. USAI Байден маъмуриятига қуролларни мавжуд захиралардан олиш ўрнига, ҳарбий саноатдан сотиб олишга рухсат беради.

Маблағлар Киевга ўрта ва узоқ муддатда мудофаасини кучайтиришга ёрдам берадиган дрон ва бошқа қуроллар бўйича шартномаларни молиялаштиради. Шу билан бирга, Америка раҳбарияти украиналик ҳарбийларни мамлакат ташқарисида тайёрлаш бўйича саъй-ҳаракатларни кучайтириши кутилмоқда. Аввалги қурол етказиб бериш Украинанинг шошилинч ҳарбий эҳтиёжларини қондириш учун амалга оширилган. 

АҚШнинг Украинага берган ҳарбий ёрдами миқдори 10,6 миллиард долларга етди, деб хабар қилмоқда Reuters. АҚШ охирги марта 19 август куни Киевга ҳарбий ёрдам кўрсатганини эълон қилган эди. Ўшанда бу тахминан 775 миллион доллар эди. 

Пентагон маълумотларига кўра, ушбу пакетга, жумладан, Американинг HIMARS ялпи ўт очиш реактив тизимлари учун қўшимча снарядлар, Украинага Буюк Британия томонидан илгари етказиб берилган 16 105 мм гаубица, 15 та ScanEagle разведка дрони, 40 та MaxxPro Mine Resistant Ambush Protected зирҳли машиналар, HARM қўшимча юқори тезликдаги радарга қарши ракеталар, 1,5 мингта TOW танкка қарши ракета тизимлари, 1 мингта Javelin танкка қарши ракета тизимлари киради.