Ҳайдовчиларни тайёрловчи ташкилотлар рейтингини аниқлаш йўлга қўйилди

Ҳукумат қарори билан автомототранспорт воситалари ҳайдовчиларини тайёрлаш, қайта тайёрлаш ва улар малакасини оширишни амалга оширувчи таълим ташкилотлари рейтингини аниқлаш тартиби тўғрисида низом тасдиқланди.

Рейтинг баҳолаш қуйидаги кўрсаткич (индикатор)лар асосида амалга оширилади:

• таълим ташкилотлари битирувчилари ҳайдовчилик гувоҳномасини олиш учун назарий ва амалий имтиҳон натижалари;
• таълим ташкилотлари битирувчилари ҳайдовчилик гувоҳномасига эга бўлгандан кейин, йил якунигача йўл ҳаракати қоидаларига амал қилмаслик ҳолларидаги жарима баллари;
• йил якунигача қонуний кучга кирган суд қарорига асосан таълим ташкилотлари битирувчилари айби билан содир этилган йўл-транспорт ҳодисалари сони;
• таълим ташкилотларида тўлиқ штатда фаолият юритадиган олий маълумотга ёки илмий даражага эга ўқитувчилар сони тўғрисида маълумотлар.

Таълим ташкилотлари рейтингини баҳолаш кўрсаткич (индикатор)лар асосида Йўл ҳаракати хавфсизлиги хизмати амалга оширилади. Рейтинг натижалари ҳар йили 25 январда ОАВ ва ижтимоий тармоқларда эълон қилинади.

Низом 2022 йил 1 сентябрдан эътиборан кучга кирди.