Дунёда энг кўп танкка эга давлатлар маълум қилинди

Сўнгги йиллардаги ҳарбий можаролар замонавий дронлар, юқори аниқликдаги қуроллар ва танкка қарши ракеталар бронетехниканинг заиф жиҳатларини намоён қилган бўлса-да, танклар ҳанузгача кўплаб давлатлар армиялари учун қуруқликдаги ҳарбий операцияларнинг асосий воситаларидан бири бўлиб қолмоқда.

Global Firepower рейтингида қуролли кучлар таркибидаги асосий жанговар танклар ҳисобга олинган. Унга кўра, Хитой 5 870 та танк билан биринчи ўринни эгаллаган. Мамлакат сўнгги ўн йилликларда зирҳли танк қўшинларини изчил модернизация қилиб, эски техникалар ўрнига маҳаллий ишлаб чиқарилган Type 99 ҳамда модернизация қилинган Type 96 танкларини жорий этмоқда. Давом этаётган серияли ишлаб чиқариш Пекинга энг йирик танк паркларидан бирини сақлаб қолиш имконини бермоқда.

Иккинчи ўринда 5 630 та жанговар танк билан Россия жойлашган. Россия танк паркларининг асосий қисмини совет даврида ишлаб чиқилган ва кейинчалик модернизация қилинган Т-72, Т-80 ҳамда Т-90 туркумидаги машиналар ташкил этади.

Учинчи поғонадан Шимолий Корея (КХДР) ўрин олган. Мамлакат тасарруфида қарийб 4 900 та танк борлиги қайд этилган. Бироқ таҳлилчилар фикрича, ушбу паркнинг катта қисми совет ва Хитой технологиялари асосида яратилган, турли даражада модернизация қилинган эски танклардан иборат.

Тўртинчи ўринни АҚШ эгаллаган бўлиб, мамлакат армиясида 4 666 та жанговар танк мавжуд. Уларнинг асосини дунёдаги энг машҳур асосий жанговар танклардан бири ҳисобланган M1 Abrams оиласи ташкил қилади.

Рейтингнинг кейинги ўринларида Ҳиндистон, Миср, Покистон, Эрон ва Туркия қайд этилган. Бу давлатларнинг ҳар бири 2 мингдан ортиқ жанговар танкка эга. Бу эса анъанавий қуруқликдаги ҳарбий операциялар ҳали ҳам миллий мудофаа стратегиясида муҳим ўрин тутаётганини кўрсатади.

Жанубий Корея, Озарбойжон, Марокаш ва Иордания танклар сони бўйича юқори ўринларни эгалламаса-да, уларнинг зирҳли танк қўшинлари яхши тайёргарликка эга ва замонавий техника билан таъминлангани қайд этилган.

Мутахассислар таъкидлашича, келажакда танкларнинг сонидан кўра уларнинг рақамли бошқарув тизимлари, ҳимоя воситалари, дронларга қарши технологиялар ва бошқа юқори технологияли қуроллар билан интеграцияси ҳал қилувчи омилга айланиши мумкин. Шу билан бирга, дунёнинг етакчи ҳарбий давлатлари бронетанк қўшинларини қисқартириш эмас, балки замонавий талабларга мос равишда янгилаш сиёсатига устувор аҳамият қаратмоқда.