Россия газини Украина орқали Европага етказиб бериш «Суджа» ГЎС орқали кунига 42,7 миллион куб метрни ташкил қилади.
«Газпром» Украина орқали транзит бўйича Европа мамлакатларига «Суджа» газ ўлчаш станцияси (ГЎС)дан «Сохранивка» ГЎС ёрдамида кунига 42,7 миллион кубометр газ етказиб беряпти, деб хабар қилди Reuters агентлиги 3 сентябр, шанба куни компания баёнотига таяниб.
Бир кун аввал «Суджа» станцияси орқали газ чиқариш ҳажми 41,3 миллион кубометрни ташкил этди.
11 майдан бери Украинанинг газ узатиш тизими оператори (УГУТО) Россия қўшинлари томонидан Луганск областида эгаллаб олинган «Сохранивка» ГЎС ва «Новопсков» компрессор станцияси (КС) орқали Европага газ транзитини тўхтатди. Компания газни кейинги ташишни имконсиз қиладиган форс-мажор ҳолатлари ҳақида хабар қилди.
Аввалроқ «Газпром» ширкати «Шимолий оқим» орқали газни юклаш дастлаб режалаштирилганидек 3 сентябрдан тикланмаслигини маълум қилганди. Россия компанияси бунга сабаб сифатида «Портовая» компрессор станциясида нефть сизиб чиқишини кўрсатди.
«Ускунанинг ишлашига оид жиҳатлар бартараф этилмагунча, «Шимолий оқим» газ қувурига газ бериш бутунлай тўхтатилди», — деб хабар қилди россиялик монополист. «Газпром» баёнотида таъкидланишича, «Siemens компаниясининг маълумотларига кўра, ушбу двигателларда мой оқиши тўлиқ бартараф этилишини фақат ихтисослаштирилган таъмирлаш компанияси шароитида амалга ошириш мумкин».
Германиянинг Siemens Energy AG компанияси бунга жавобан «Шимолий оқим» газ қувури ишини тўхтатиш учун ҳеч қандай техник сабаблар йўқлигини айтди. «Турбина ишлаб чиқарувчиси сифатида фақат шуни таъкидлашимиз мумкинки, бундай хулоса («Газпром»нинг) ишни тўхтатиш учун техник сабаб бўлмайди. Бундай сизиб чиқиш одатда турбинанинг ишлашига таъсир қилмайди ва уларни жойида бартараф этиш мумкин, - деди компания вакили.
Унинг сўзларига кўра, бундай муаммоларни бартараф этиш - «профилактика ишлари доирасидаги мунтазам операция»дир. Siemens’да таъкидланишича, илгари бундай сизиб чиқишларнинг пайдо бўлиши қурилма ишини тўхтатишга олиб келмаган.
