Экологик талабларга жавоб бермайдиган 29 та чиқинди полигони ёпилади

Президентнинг “Санитар тозалаш ишларини ташкил этиш ва аҳоли пунктларида тозаликни таъминлаш бўйича қўшимча чора-тадбирлар тўғрисида”қарорига мувофиқ, 2023–2024 йилларда қаттиқ маиший чиқинди полигонларини рекультивация қилиш бўйича манзилли дастур тасдиқланди.

Давлат экология қўмитаси хабарига кўра, Ўзбекистонда 2023–2024 йилларда 190 гектардан ортиқ майдондаги экологик талабларга жавоб бермайдиган 29 та чиқинди полигонлари ёпилади. 

Манзилли дастур доирасида:

• Давлат экология қўмитаси маиший чиқинди полигонларини рекультивация қилиш ишларига буюртмачи ҳисобланади;
• харажатлар Қорақалпоғистон Республикаси бюджети ва вилоятлар маҳаллий бюджетлари ҳамда Экология, атроф-муҳитни муҳофаза қилиш ва чиқиндилар билан боғлиқ ишларни амалга ошириш жамғармаси маблағлари ҳисобидан тенг миқдорда молиялаштирилади;
• рекультивация қилинган ҳудудлар маҳаллий ижро этувчи ҳокимият органлари ер захираларига қайтарилади.

Бугунги кунда республика ҳудудида 1 000 га ер майдонига яқин 197 та маиший чиқинди полигонлари мавжуд бўлиб, улар фаолиятини 2028 йилгача тўхтатиш белгиланган.