Япония Россияга кимёвий қурол билан боғлиқ товарлар экспортини тақиқлади

Япония оккупацион ҳокимиятлар томонидан Донбасснинг «ДХР» ва «ЛХР» тузилмаларида, шунингдек, Украинанинг Херсон ва Запорижжя областларида Россия таркибига қўшилиш бўйича «референдумлар» ўтказилиши фонида Россияга қарши санкцияларни кенгайтирди. Япония Иқтисодиёт, савдо ва саноат вазирлигининг 26 сентябр, душанба куни сайтида эълон қилинган баёнотига кўра, Токио Россияга кимёвий қурол ишлаб чиқариш билан боғлиқ товарлар экспортини тақиқлади.

Бундан ташқари, экспорт чекловларига дучор бўлган Россия компанияларининг санкциялар рўйхатига яна 20 та ташкилот киритилди. Улар орасида, жумладан, «Мосэлектронпроект» («Российская электроника» шуъба корхонаси), «Эталон», «Информакустика» («Ростех» таркибига кирувчи), «Курчатов институти» Миллий тадқиқот марказининг А.И.Алихонов номидаги Назарий ва экспериментал физика институти ва «Салют» заводи бор.

Япония Ташқи ишлар вазирлиги ўтган ҳафта Москвани «референдумлар» туфайли Россияга қарши экспорт санкцияларини кенгайтириш режалари ҳақида огоҳлантирган эди. Ўшанда ташқи ишлар вазири Ёшимаса Хаяши ҳарбий ва мудофаа соҳасига оид компаниялар чекловларга дучор бўлишини эълон қилди. Бундан аввалроқ АҚШ ва Европа иттифоқи «референдумлар» ўтказилган тақдирда янги санкциялар ҳақида огоҳлантирган эди. 

24 февралда Россиянинг Украинага қуролли бостириб кириши бошланганидан бери Япония Россияга қарши бир нечта санкциялар пакетини жорий қилди. Жазо чоралари экспорт ва импорт, банк сектори, давлат муассасалари, компаниялар ва жисмоний шахсларга таъсир кўрсатди.