Украина НАТОга кириш учун ариза беради. Зеленский Россия билан музокаралар эҳтимолини баҳолади 

Украина НАТОга аъзо бўлиш учун расман ариза беради. Бу ҳақда Украина президенти Володимир Зеленский ўз банотида маълум қилди.

«Бугун бу ерда, Киевда, мамлакатимиз юрагида барча озод халқлар ҳамжамияти хавфсизлиги учун қадам ташлаяпмиз.  

Бизга ким таҳдид қилаётганини, ким ўлдириш ва ногирон қилишга тайёрлигини, ким ўз назорат ҳудудини кенгайтириш учун ҳар қандай ёввойиликдан қайтмаслигини кўриб турибмиз.

24 феврал куни Украинага биринчи тўлақонли зарба берилди. Биринчи! 

Агарда Россияни тўхтатмаганимизда, у бизнинг чегараларимизда тўхтамасди. Қолган давлатлар ҳам зарба остида қолган бўларди. Болтиқ мамлакатлари, Полша, Молдова ва Грузия, Қозоғистон…

Россия Европа ва Осиёнинг турли халқларини бўйсундиришга даъвогарлик қилди. Ярим йил аввал даъвогарлик қилганди. Бу жиноий мақсад Украинада чилпарчин бўляпти. У Киев ва Черниҳивда синди. «Азовстал»да. Суми ва Харкив областида. Илонлар оролида. У Донбасс ва Украина жанубида ҳам уларни озод қилганимиздан сўнг синади. Албатта – Қримда, озод Украина Қримида ҳам. 

Давлатимизнинг бутун ҳудуди ушбу душман – нафақат Украинанинг, балки ҳаёт, инсонийлик, қонун ва ҳақиқат душманидан озод қилинади. 

Россия буни билади, қудратимизни ҳис қилмоқда. Айнан шу ерда, Украинада қадриятларимиз кучини тиклаётганимизни кўрмоқда. У шу сабабли шошиляпти. Аннексияга уриниб бу сохтакорликни уюштирмоқда. Ўзига тегишли бўлмаган нарсани тортиб олишга уриняпти. Қотилликлар, таҳқирлашлар, шантаж ва ёлғон билан тарихни қайта ёзиш ва чегараларни қайта чизишни истамоқда.  

Украина бунга йўл қўймайди.  

Бугун олий бош қўмондонлик йиғилишини ўтказдим. Миллий хавфсизлик ва мудофаа кенгаши йиғилиши тугаши билан. Бизда қарор мавжуд.

Биринчиси. Фақат кучайиш ва босқинчиларни бутун ҳудудимиздан қувиш йўлигина тинчликни қайтаради. Биз шу йўлдан борамиз.  

Иккинчиси. Украина музокаралар бўйича етакчи бўлган ва шундай бўлиб қолади. Айнан биз Россияга тенг, ҳалол, муносиб ва одилона шароитларда кенгашишни таклиф қилдик. Афтидан, Россиянинг ҳозирги президенти билан бунинг имкони йўқ. У ғурур ва ҳалоллик нималигини билмайди. Шу сабабдан биз Россия билан мулоқотга тайёрмиз, лекин Россиянинг бошқа президенти билан.

Учинчиси. Биз амалда эришган барча нарсани юридик жиҳатдан қайд этишимиз керак.

Демократиянинг тиранияга қарши курашдаги тақдири айнан Украинада ҳал бўлмоқда. Айнан шу ерда чегараларимиз мустаҳкамлиги билан барча Европа давлатларининг чегараларини мустаҳкамлашимиз мумкин. Биз қайтиб ҳеч ким қитъамизга урушни қайтаришга журъат қила олмаслигига кафолат берамиз.  

Айнан Украинада Евроатлантика ҳамжамиятимизнинг қадриятлари жонли кучга эга бўлди. Озодлик учун курашаётган халқлар ва бу курашда ёрдам бераётган халқларнинг кучига. 

Биз амалда иттифоқчилармиз. Бунга аллақачон эришилган. НАТОга йўлни амалда босиб ўтдик. Алянс стандартларига мослигимизни амалда исботлаб бўлдик. Улар Украина учун реал – жанг майдонида ҳам, ҳамкорлигимизнинг барча жиҳатларида ҳам.

Биз бир-биримизга ишонамиз, бир-биримизга ёрдам берамиз ва бир-биримизни ҳимоя қиламиз. Мана шу Шимолий Атлантика иттифоқи. Амалда.

Бугун Украина буни юридик жиҳатдан бажариш учун ариза беради. Жадаллаштирилган тартибда.

Бунинг имкони борлигини биламиз. Бу йил Финландия ва Швеция аъзолик бўйича ҳаракатлар дастурисиз алянсга қўшилишни бошлаганини кўрдик.

Бу адолатли. Украина учун ҳам адолатли бўлади. Бу ҳаётда эришилган ва қадриятларимиз ҳисобланган шартнома даражасидаги мустаҳкамлик бўлади.

Бу Шимолий Атлантика иттифоқининг барча аъзолари розилигини талаб қилишини тушунамиз. Шу боис Украина ва бутун Европа учун хавфсизлик кафолатлари бўйича таклифларимизни Киев хавфсизлик шартномасига мувофиқ амалга оширишни таклиф қиламиз.  

Хавфсизликнинг муқобили йўқ. Лекин уни кафолатлаш учун қатъият зарур.

Биз Украинанинг НАТОга тезлаштирилган тартибда ариза бериши орқали ўз қадамимизни ташлаяпмиз.

Бугун Украина миллий хавфсизлик ва мудофаа кенгаши Россиянинг инсонийлик ва халқаро ҳуқуқни ҳимоя қилишга матонат топа олмаган ёки Украина ва демократик халқлар ҳамжамиятига қарши тажовузкор қадамлар қўйишга у ёки бу тарзда алоқадор бўлган жисмоний ва юридик шахсларига нисбатан санкциялар қўллаш тўғрисидаги қарорни қабул қилди.   

Ва шу билан бирга Украина халқ депутатларига мурожаат қилмоқчиман: Украина Олий радасининг навбатдаги йиғилишида Россиянинг барча активларини миллийлаштириш тўғрисидаги қонун лойиҳаси кўриб чиқилади. Ушбу қонун лойиҳасини қўллаб-қувватлашингизни сўрайман.

Россиянинг Украина, Европа ва дунёга таъсирини парчалашни ниҳоясига етказамиз».

• 30 сентябр куни Россия президенти Владимир Путин «ДХР» ва «ЛХР» билан, шунингдек босиб олинган Запорижжя ва Херсон областлари билан халқаро келишув имзолади. Бу мазкур ҳудудлар аннексия қилинишидаги навбатдаги босқич бўлди.
• Путин Украинанинг НАТОга аъзо бўлишга интилишини босқин сабабларидан бири сифатида келтирган. Уруш бошланганидан бир ойдан ошиқ вақт ўтганида Истанбулда бўлиб ўтган тинчлик музокараларида Украина Шимолий Атлантика альянсига аъзо бўлишдан воз кечиши эвазига тинчлик ўрнатилишига ҳаракат қилганди. Аммо якунда музокаралар музлатилганди.
• Россиянинг Украинага босқини ортидан Финландия ва Швеция НАТОга аъзо бўлиш учун ариза топширди. Аввалига Туркия бунга қаршилик қилганди, аммо якунда томонлар келишувга эришди ва Анқара ўз эътирозларини қайтариб олди.