Украина Европага электр энергияси етказиб беришни тўхтатади 

Бу Россиянинг йирик ракета ҳужумидан кейин энергетика тизимини барқарорлаштириш учун зарур. Идоранинг аниқлик киритишича, электр нимстанциялари ўққа тутилгани сабабли, иссиқлик генерация қилиш тизими зарарланган. 

Вазирлик Украинадан электр энергияси экспорти Европага Россия газини алмаштириш имконини берганини, шунингдек, Европа энергетика тизимининг барқарорлигини қўллаб-қувватлаганини маълум қилди. 

«Бугунги ракета ҳужумлари электр нимстанцияларига зарба берди ва иссиқлик генерация қилиш тизимига зарар етказди. Бу эса Украинани ўз энергия тизимини барқарорлаштириш учун 2022 йил 11 октябрдан бошлаб, электр энергияси экспортини тўхтатишга мажбур қилди», — дейилади баёнотда. 

«Украинадан электр энергияси экспорти Европага Россия энергия ресурсларини истеъмол қилишни камайтиришга ёрдам берди. Шу сабабли, Россия бизнинг энергетика тизимимизни вайрон қилмоқда, Украинадан электр энергиясини экспорт қилиш имкониятини йўқ қилмоқда», - деди Украина энергетика вазири Герман Галушченко. 

Украинанинг «Укрэнерго» электр узатиш тизими оператори март ойидан Польшага, май ойидан эса Молдовага экспорт қилишни бошлаган, 30 июнь куни Руминия билан, 7 июлдан Словакия билан электр энергияси савдоси йўлга қўйилган эди. 

10 октябрь куни эрталаб Украина ҳудуди Россиядан ракета ҳужумларига учради. Киев, Житомир вилояти, Одесса ва Харкив шаҳарлари ўққа тутилди. Украина расмийларига кўра, 5 киши ҳалок бўлди, 30 дан ортиқ киши жароҳатланди, 11 та муҳим инфратузилма объекти шикастланди. Украинанинг бир қанча вилоятларида электр энергияси ва сув таъминотида узилишлар кузатилди.