ЕТТБнинг Ўзбекистонга навбатдаги молиявий кўмаги доирасида "Ўзбекистон миллий электр тармоқлари"га янги электр узатиш линиясини қуриш, миллий электр тармоқлари ўтказувчанлигини кенгайтириш ва ишончлилигини ошириш лойиҳасини ҳаётга татбиқ этиш учун 47,1 миллион доллар миқдорида кредит ажратди.
Лойиҳа Эрта ўтиш даври иқтисодиётига эга мамлакатлар жамғармаси ва Акциядорлар махсус жамғармаси томонидан қўллаб-қувватланмоқда.
Маблағлар Хоразм ва Бухоро вилоятларидаги Саримой ва Жонкелди аҳоли яшаш пунктлари ўртасида янги электр узатиш линиясини қуришга йўналтирилмоқда. Янги линия қурилаётган, умумий қуввати 1 Гвтли иккита шамол электр станциясини миллий тармоқ билан боғлайди.
Тармоқ шу тарзда кенгайиши қайта тикланадиган энергия манбаларининг Ўзбекистон энергетика тизимига янада интеграциялашувига ёрдам беради. Бу мавжуд электр узатиш линияларидаги юкламани мувозанатлашга ҳамда мамлакат шимолий ва жануби-ғарбий қисмида электр таъминотидаги узилишлар муаммосини ҳал қилишга ёрдам беради.
Лойиҳа электр таъминоти тизими қувватини яхшилайди ва тармоқдаги йўқотишларни камайтиради. ЕТТБ биринчи вице-президенти Юрген Ригтеринк таъкидлашича: “Ўзбекистон нафақат Марказий Осиёдаги энг кўп аҳолига эга давлат, балки барқарор инфратузилмавий ечимларга муҳтож бўлган минтақадаги энг тез ривожланаётган иқтисодиётдир. Бизнинг Банкимиз бундай лойиҳаларни молиялаштириш орқали ушбу ўсишни қўллаб-қувватлашга тайёрдир”.
