АҚШ Россия алюминийсини бутунлай тақиқлаш масаласини кўриб чиқмоқда

Шу вақтгача алюминий автомобилсозлик, самолётсозлик, қурилиш ва юқори технологиялар соҳасида муҳим элемент бўлгани сабабли турли санкциялардан ҳимояланган эди.

Bloomberg хабарига кўра, Оқ уй Украинадаги уруш эскалацияси туфайли Россияга қарши янги чораларни ўрганмоқда, жумладан, Россиядан алюминий импортини тўлиқ тақиқлаш, божларни импорт учун фойдасиз даражага кўтариш ёки «Русал» компаниясига қарши санкциялар қўллаш.

Аввалроқ, АҚШ Конгрессининг бир қатор аъзолари мамлакатнинг Россия ва бошқа мамлакатлардан алюминий харид қилишга боғланиб қолганидан хавотир билдирган эди. Конгрессменлар бу борада мудофаа вазирининг саноат сиёсати бўйича ёрдамчиси вазифасини бажарувчи Дебора Розенблюмга мурожаат қилиб, соф алюминий ишлаб чиқариш имкониятлари билан қизиқишди. Шунингдек, «Қўшма Штатларнинг алюминий етказиб берувчи мамлакатлар, жумладан Россияга қарамлигини янада кучайтириши мумкин бўлган сўнгги воқеаларга» эътибор қаратишди.

Россия алюминий ишлаб чиқариш бўйича Хитойдан кейин дунёда иккинчи ўринда туради. Эҳтимолий тақиқ ҳақидаги хабар тарқалганидан сўнг, дунё биржаларида ушбу металлнинг нархи оша бошлади.