Трампнинг собиқ ёрдамчиси тўрт ойлик қамоқ жазосига ҳукм қилинди 

Шунингдек, Бэннон 6500 доллар миқдорида жарима тўлаши керак бўлади. 

«Конгресс кун тартибига риоя қилмаслик қонун чиқарувчи органга ҳурматсизликдан далолат беради. <…> Бэннон Конгрессга ҳурматсизлик қилганлик учун тўрт ойлик қамоқ ва 6500 доллар жаримага тортилди», — деб ҳукмни эълон қилди Колумбия округи судьяси Карл Николс. 

Федерал прокуратура Бэннон учун 6 ойлик қамоқ жазоси ва 200 минг доллар миқдорида жарима сўраган эди. 

Судьянинг сўзларига кўра, ҳукм устидан 15 ноябргача шикоят қилиш мумкин. Агар Бэннон бундай қилишни хоҳламаса, ўша куни Федерал қамоқхоналар бюросига бориши шарт. Шундан сўнг у жазони ўташ учун қамоқхонага юборилади. 

Бэннон адвокатлари ҳукм устидан апелляция берилишини маълум қилишди. 

Трамп президентлиги даврида Оқ уйнинг сиёсий стратеги (2017 йил 20 январдан 18 августгача) бўлиб ишлаган Бэннон шу йилнинг июль ойида АҚШ Конгрессига ҳурматсизлик қилган деб топилган эди. 

У 2021 йил 6 январда Капитолийга ҳужум уюштирилиши билан боғлиқ Конгресс суриштирувларида кўрсатма беришни ва ҳужжатларни тақдим қилишни истамади. Қонун чиқарувчи орган талабларини бажармаслик Қўшма Штатларда жиноят ҳисобланади.