Собчак Россиядан қочди, унинг вакиллари товламачиликда айбланиб қўлга олинди

«У Литвада. Исроил фуқароси бўлгани учун унга виза ҳам керак эмас. Адашмасам, бу ерда 90 кунгача қолиши мумкин», деди Литва хавфсизлик департаменти раҳбари Дарюс Яунишкис.

Собчак ҳали Россиядан чиқиб кетиш сабабини изоҳлагани йўқ. Ижтимоий тармоқларда Собчак Литва чегарасини пиёда босиб ўтгани тасвирланган кадрлар тарқалди. Россия давлат нашрлари эса Собчак мамлакатни тарк этганини ўзларининг махсус хизматлардаги манбаларига таяниб ёзишмоқда.

«У Москвадан сешанба куни тунда чиқиб кетган. Бир кун олдин Дубайга, кейин Туркияга авиачипта сотиб олган. Буни тезкор ходимларни чалғитиш учун қилган. Охир-оқибат Литвага Беларус орқали ўтган», деб номаълум манбанинг номини келтирган ТАСС Россия давлат ахборот агентлиги.

ТАСС ва Russia Today нашрлари манбалари Собчак товламачилик иши бўйича жиноий иш фигуранти сифатида гумонланаётганини тасдиқлаган.

Собчакнинг директорига қарши айблов

Чоршанба куни кечқурун Моквадаги Твер судида Ксения Собчакнинг тижорий директори Кирилл Суханов устидан суд жараёни бўлиб ўтди. Суд уни икки ойга жазони ижро этиш колониясига жўнатишга қарор қилди. Судда айтилган иш ҳужжатларидан маълум бўладики, Суханов «Ростех» раҳбари Сергей Чемезовдан 11 миллион рубл пулни товламачилик йўли билан олишда айбланмоқда.

Тергов ҳужжатларида иддао қилинишича, Суханов бу пулларни «Тушите свет» Telegram-каналида Чемезов ҳақида салбий хабар чиқармаслик учун олган. Судда айтилишича, Суханов гўёки Чемезовнинг вакилларидан 800 минг рубл олаётганда қўлга олинган.

Россиядаги янгиликларни бериб борувчи «112» Telegram-канал ишда жабрланувчи сифатида Василий Бровко кўрсатилгани ҳақида ёзди. У «Ростех» махсус топшириқлари бўйича директор ва россиялик телепродюсер Тина Канделакининг эри ҳисобланади. «Медиазона»нинг ёзишича, Суханов судда жабрланувчидан кечирим сўрашга ва 800 минг рубл олганини тан олишга рози бўлган.

Суд ишидан маълум бўладики, Суханов Москвадаги «Арбат» меҳмонхонасида жойлашган Regent ресторанида қўлга олинган. ОАВда ёзилишича, Сухановдан ташқари «Татлер» собиқ бош муҳаррири Ариан Романовский (Кузмин) ҳам қўлга олинган. Унинг адвокати мижози ҳам товламачиликда айбланаётганини тасдиқлади.

Суханов қўлга олинганидан кейин Собчакнинг каналида телебошловчи унинг тижорий директорига нисбатан айбловга ишонмаслиги, бу сафсата экани, тезда барчасини аниқлаштириши ҳақида баёнот пайдо бўлди. «Бу зулм қилинмай қолган Россиядаги охирги мустақил манба бўлмиш менинг таҳририятимга нисбатан ҳужумга ўхшаяпти. Умид қиламан, бундай эмас ва бу шунчаки тушунмовчилик сабаб юзага келган», деб ёзди Собчак.

Собчакнинг медиаҳолдинги

Ксения Собчак 1990-йилларда Владимир Путиннинг устози ва ҳамкасби бўлган, Санкт-Петербург собиқ мэри Анатолий Собчакнинг қизи ҳисобланади. Узоқ йиллар Россия телеканалларида бошловчи бўлиб ишлаган, машҳур шоуларни олиб борган. 2011 йил Россия Давлат думасига ўтказилган сайловлардан кейин Россия ҳукуматига қарши намойишларда иштирок этган. Натижада Россия мухолифатининг таъсис ҳайъатига кирган.

Бир неча йил «Дождь» телеканалида (ҳозирда Россияда «чет эл агенти» деб топилган) мухбир бўлиб ишлаган, Путин иштирокидаги матбуот анжуманларида қатнашган.

2018 йил Собчак Россия президентлиги учун сайловларда иштирок этди. ОАВда унинг номзоди Кремл билан келишилгани, Москва бу орқали гўёки сайловда мухолифат вакиллари ҳам иштирок этаётганини кўрсатишга урингани ҳақида ёзганди. Собчакнинг ўзи эса бу иддаоларни рад этган.

Журналист 3 йилдан буён YoutTube'да «Осторожна: Собчак» каналини юритиб, кўплаб машҳур инсонлардан интервюлар олиб келмоқда. Канални 3,2 миллиондан ортиқ одам кузатиб боради. YouTube'даги муваффақият ортидан Собчак «Осторожна Media» медиаҳолдингини ташкил этди. Таҳририят тез орада 1,5 миллион ўқувчига эга бўлди.

Урушдан кейин...

Россия Украинага бостириб кирганидан кейин рус журналистларига босим кучайди. Кўплаб медиа вакиллари «армияни камситиш», «ҳарбий фейк» тарқатгани иддаоси билан айбланиб, мамлакатдан чиқиб кетишга мажбур бўлди. Собчакнинг ходимлари бу вақт давомида жарималардан қочиб келишаётганди. Ваҳоланки Собчак интервю олган қаҳрамонларнинг аксари Россия ҳуқуқни муҳофаза қилувчи органлари эътиборига тушган.

Масалан, ҳужжатли филмлар олиши билан танилган Виталий Манский айнан Собчакка берган интервюсидан кейин россиялик пропагандачи режиссёр Никита Михалковга нисбатан туҳмат қилгани иддаоси билан жиноий иш фигурантига айланганди. Интервюда Манский Москва халқаро кинофестивалининг камида 85 фоиз бюджети «туя қилиниши»ни айтганди. Михалков эса фестивал президенти, айни дамда урушнинг энг фаол тарғиботчиларидан бири ҳисобланади. Собчакни ҳам бу иш юзасидан гувоҳ сифатида сўроқ қилишган.

Октябр ойи бошида бу интервю юзасидан Собчакнинг ўзига нисбатан ҳам жиноий иш очилиши мумкинлиги ҳақида хабарлар пайдо бўлди, аммо бундай бўлмади. Ўтган ҳафтада Собчак билан бирга ишлайдиган журналистлар Сергей Ерженков ва Евгения Теренова Тверда сафарбарликка жалб қилинганларнинг шароитлари ҳақида кўрсатув суратга олаётган вақтда қўлга олинганди.

Шунингдек, полиция Ерженков ва блогер Сергей Скореевга нисбатан вандализм бўйича иш очилганди. Март ойида улар Лениннинг Рязандаги ёдгорлиги остига «Путин, кет» деб ёзишди. Кейинроқ буни ёдгорликнинг хароб аҳволига эътибор қаратиш учун қилишганини айтишди. Суд эса уларнинг иккисини 15 минг рублдан жаримага тортди.