Собчак Путиндан 16 кишини афв этишни сўради

Ксения Собчак Россия президенти Владимир Путиннинг мамлакат президентлиги учун сайловлар бўйича рақиблари билан учрашувида унга 16 кишини афв этиш тўғрисида илтимоснома тақдим этди. Бу ҳақда Собчакнинг сайловолди штаби матбуот хизмати хабар берди.

"Собчакнинг рўйхатида 16 фамилия бор: Дмитрий Борисов, Станислав Зимовец, Александр Кольченко, Владимир Лапигин, Сергей Мохнаткин, Олег Навальний, Александр Соколов, Олег Сенцов ва бошқалар", - дейилади хабарда.

Таъкидланишича, президент унинг илтимосномасини кўриб чиқишга ваъда берган.

Эслатиб ўтамиз, мухолифатчи Алексей Навальний ва унинг укаси Олег 2014 йилнинг декабрида “Ив Роше” компаниясидан 26 млн рубль ҳамда “Кўп профилли процессинг компанияси”дан 4 миллиондан кўпроқ рублни талон-торож этгани учун судланди. Кучга кирган ҳукмга кўра, Алексей Навальний шартли равишда уч ярим йил олди, Олег Навальний эса – худди шундай муддатли, фақат ҳақиқий қамоқ тарзида.