Полша ва Словакия парламентлари киберҳужумларга учради

Полша ва Словакия парламентлари, жумладан, Россиядан ҳам киберҳужумларга учради, деб хабар бермоқда AFP агентлиги 27 октябр, пайшанба куни парламент вакилларига таяниб.

Киберҳужумлар «бир неча йўналишдан, шу жумладан Россиядан» амалга оширилди, деди Полша Сенати вакили. Унинг фикрича, бунга Россия ҳукуматини «террористик режим» деб эълон қилган Сенатда чоршанба куни ўтказилган овоз бериш сабаб бўлиши мумкин.

Словакияда парламентда овоз бериш тизими зарар кўрди. «Парламентнинг бутун компьютер тармоғи ишдан чиқди», деди парламент спикери ўринбосари Габор Грендел. Соат 11 га белгиланган овоз бериш ўтказилмади ва парламент мажлиси тўхтатилди, дея қўшимча қилди у. Барча компьютерлар ва телефонлар ўчирилган, бу эса парламент аъзоларининг бир нечта қонун лойиҳалари бўйича овоз беришларига тўсқинлик қилди, деди Словакия парламенти спикери Борис Коллар.

Октябрь ойи ўрталарида россиялик хакерлар Болгария ҳукумати идораларининг бир қатор веб-сайтларига ҳужум қилишди, хусусан, Болгария президенти, ҳукумати, асосий вазирликлари ва Конституциявий судининг ресурслари оммавий DDoS-ҳужумга учради.

Россиянинг Killnet хакерлар гуруҳи ҳужум учун жавобгарликни ўз зиммасига олди. У аввалроқ Германия ва Литва каби бир қанча мамлакатлардаги давлат идоралари ва хусусий компаниялар веб-сайтларига бир қанча DDoS-ҳужумларни амалга оширган. Spiegel нашрига кўра, Германиядаги ҳужум Украинага қурол етказиб бериш билан боғлиқ. Литвада ҳужум Калининградга юк транзитини тўсиб қўйиш билан алоқадор бўлган.