Маск: Twitter директорлар кенгашининг ишдан бўшатилиши - вақтинчалик чора

SpaceX асосчиси ва Tesla бош директори Илон Маск 44 миллиард долларга сотиб олган Twitter Inc компаниясининг бош директори лавозимини эгаллашини айтди. 31 октябр, душанба куни Маск Twitter Inc директорлар кенгаши тарқатиб юборилгани ҳақида АҚШ Қимматли қоғозлар ва биржа комиссиясига тақдим этилган баёнотга асосланиб TESMANIAN нашри томонидан берилган хабарга шундай жавоб берди: «Бу - вақтинчалик чора».  

Тадбиркор дарҳол компания сафини топ-менежерлардан тозалашга киришди. Хусусан, бош ижрочи директор лавозимини эгаллаган Параг Агравал, молия директори Нед Сегал, шунингдек, юридик бўлим бошлиғи Вижая Гадде ишдан бўшатилди. 

Reuters хабарига кўра, Илон Маск топ-менежерларни микроблоглар тармоғидаги сохта аккаунтлар сони бўйича уни ва инвесторларни чалғитаётганликда айблаган.

Аввалроқ тадбиркор ижтимоий тармоқ раҳбарияти «контентни модерация қилиш» бўйича махсус кенгаш тузиб, унинг таркибига «нуқтайи назари сезиларли даражада фарқ қилувчи» одамлар киришини айтган эди. 

«Twitter турли хил қарашларга эга контентни бошқариш кенгашини шакллантиради. Бу кенгаш чақирилгунга қадар контент ёки аккаунтни тиклаш бўйича муҳим қарорлар қабул қилинмайди», - деб ёзди Маск. 

Bloomberg хабар беришича, Twitter’ни сотиб олгандан сўнг Маск бошқа нарсалар қаторида ижтимоий тармоқ фойдаланувчиларини умрбод блоклашдан воз кечишни режалаштирмоқда. Бундай тақиқ остида 2021 йил январида Капитолий биносида тарафдорларининг тартибсизликларидан кейин блокланган АҚШ собиқ президенти Доналд Трамп ҳам бор. 

Маск аввалроқ ижтимоий тармоқни пул учун эмас, балки «ўзи севган инсониятга ёрдам бериш» мақсадида сотиб олишга қарор қилгани ҳақида баёнот берган эди. «Twitter’ни қўлга киритишимга сабаб - цивилизация келажаги учун кенг кўламли фикрларни соғлом тарзда, зўравонликка мурожаат қилмасдан муҳокама қилиш мумкин бўлган умумий рақамли платформага эга бўлиши муҳим», деди Маск. «Қуш озодликка чиқарилди», деб ёзган тадбиркор ижтимоий тармоқни харид қилганидан кейин.