Байден: АҚШ қўшинлари Шарқий Европада узоқ вақт қолади

Бундан бир неча соат олдин Оқ уйнинг стратегик алоқалар бўйича координатори Жон Кирби ҳам худди шундай баёнот билан чиққан эди. 

Унинг таъкидлашича, Қўшма Штатлар шарқий қанот хавфсизлигини жуда жиддий қабул қилади ва шунинг учун ҳам президент Байден Европага қўшимча 20 минг америкалик аскар юборган.

Аввалроқ АҚШ президенти Жо Байден Россия президенти Владимир Путиннинг Россия Украинада ядро қуролидан фойдаланиш ниятида эмаслиги ҳақидаги баёнотига шубҳа билан муносабат билдирганди. 

27 октябр, пайшанба куни Newsnation нашрига берган интервьюсида Байден риторик тарзда шундай савол билан мурожаат қилди: «Агар у буни қилмоқчи бўлмаса, нега у бу ҳақда гапиряпти? Нега у тактик ядро қуролидан фойдаланиш имконияти ҳақида гапиряпти?». У Путиннинг бу муаммога ёндашувини «жуда хавфли» деб ҳисоблашини таъкидлаб ўтди.

Владимир Путин «Валдай» халқаро мунозара клубининг ялпи мажлисида сўзга чиқиб, Украина гўёки «ифлос бомба портлатиш»ни режалаштираётганини айтиб, бунинг учун Россияни айбламоқчи эканини билдирди. «Улар уни «Точка-У» ёки бошқа жойга юклаб, қурилмани қаердадир портлатиб, Россия буни қилди - ядровий зарба берди, дейишади. Лекин биз буни қилишимиз шарт эмас. Бизга керак эмас - на сиёсий, на ҳарбий жиҳатдан», деди Путин.

Айни пайтда, сўнгги бир неча ҳафта ичида Россия президенти ҳам, Россия расмийларининг бошқа вакиллари ҳам Москва ўз ядровий доктринасида назарда тутилган ҳолатларда ядро қуролидан фойдаланиши мумкинлигини бир неча бор такрорладилар. Бу ҳужжатда айтилишича, Россия ўзига ёки иттифоқдошларига ядро қуроли ёки бошқа оммавий қирғин қуролларидан фойдаланган ҳолда ҳужумга жавобан ёки оддий қуроллар билан тажовуз содир этилган тақдирда, агар «давлатнинг мавжудлиги хавф остида бўлса, ядровий қуролдан фойдаланиши мумкин».