Украина Россиянинг музокаралар бўйича янги таклифини рад этди

Украина Ташқи ишлар вазирлиги матбуот котиби Олег Николенко Москванинг музокараларга тайёрлиги ҳақидаги янги баёнотини «янги тутун пардаси» деб атади. «Россия расмийлари ҳар сафар рус қўшинлари жанг майдонида мағлубиятга учраганида музокаралар ҳақида эслай бошлайди», деб ёзди у Facebook'да 9 ноябрь оқшомида.

«Москва Украинада тинчлик ўрнатилишидан манфаатдор эмас, - деди украиналик расмий. - Россия ўзини мулоқотга тайёрлигини кўрсатиб, бўлинмаларни қайта тўплаш, яқинда сафарбар қилинган россияликларни тайёрлаш, қурол-яроғ етишмаслиги муаммосини ҳал қилиш, логистика камчиликларини бартараф этиш учун вақт ютишга ҳаракат қилмоқда. Кейин эса у янги кучлар билан янги тажовуз тўлқинларига мурожаат қилади. Биз буни 2014-2015 йилларда кўрганмиз».

Николенконинг таъкидлашича, «тинчлик музокараларидан ҳақиқатан ҳам манфаатдор бўлганлар шаҳар ва қишлоқларни вайрон қилмайди, тинч аҳолини ўлдирмайди, энергетика инфратузилмасини вайрон қилмайди, вақтинча босиб олинган ҳудудлар аҳолисини масхара қилмайди, озиқ-овқат таъминотига аралашмайди». У, шунингдек, Россия қўшинларини Украинанинг бутун ҳудудидан олиб чиқиб кетиш, босиб олинган ҳудудлардаги ноқонуний қарорларни бекор қилиш ва Украинага компенсация тўлашни бошлашни музокаралар учун шарт деб билишига шама қилди.

Аввалроқ, 9 ноябрь куни Россия Ташқи ишлар вазирлиги матбуот котиби Мария Захарова Россия Украина билан музокаралар учун «ҳамон» очиқ эканини айтган эди. «Биз улардан ҳеч қачон воз кечмаганмиз. Биз уларни, албатта, ҳозирги пайтда юзага келаётган воқеликни ҳисобга олган ҳолда ўтказишга тайёрмиз», деди у брифинг чоғида.

Айни пайтда, ўша куни Россия Мудофаа вазири Сергей Шойгу 24 февралдан кейин Россия қўлга олишга муваффақ бўлган Украинанинг ягона минтақавий маркази - Херсондан чекинишни буюрди. Бу Украинадаги Россия Қуролли кучлари бош қўмондони Сергей Суровикин вазият ҳақида ҳисобот бериб, «қўшинларни Днипро чап қирғоғига олиб чиқиш»ни таклиф қилганидан кейин содир бўлди. Оммавий ахборот воситалари ҳисоб-китобларига кўра, ўша пайтда дарёнинг ўнг қирғоғида жойлашган деярли 4900 квадрат метр ҳудуд Россия қўшинлари назорати остида эди. 

Киевда Шойгунинг буйруғига вазминлик билан муносабат билдиришди. Украина президенти девони раҳбари маслаҳатчиси Михайло Подоляк Reuters агентлигига берган интервьюсида Россия қўшинларини Херсондан олиб чиқиб кетиш ҳақида гапиришга ҳали эрта эканлигини айтди - аксинча, унинг сўзларига кўра, Россия минтақага янги кучларни, қўшинларни йиғмоқда. «Юг» оператив қўмондонлиги матбуот маркази раҳбари Наталя Гуменюк Херсоннинг таслим бўлиши ҳақидаги баёнот Москванинг «ҳақиқий ниятлари ҳақида нотўғри таассурот яратишга» уриниш бўлиши мумкинлигини истисно қилмади. НАТО бош котиби Йенс Столтенберг ҳам изоҳ беришдан ўзини тийиб, Херсон атрофида содир бўлаётган воқеаларни баҳолашга ҳали эрта эканлигини тушунтирди.