Microsoft Россияни Полша ва Украинадаги киберҳужумларда айблади

АҚШнинг Microsoft компанияси Россия ҳарбий разведкасини октябрь ойида Украина ва Полшадаги транспорт ва логистика ташкилотларини нишонга олган тўлов дастури ҳужумларида айблади. Хусусан, жавобгарлик Россия «ГРУ» билан алоқадорлиги тахмин қилинаётган Sandworm (Iridium) хакерлар гуруҳига юкланган, деб хабар қилди Американинг CNN телекомпанияси 10 ноябрь, пайшанба куни кечқурун Microsoft вакилига таяниб.

Телекомпания суҳбатдошининг сўзларига кўра, Sandworm ёки Iridium ҳужумлар учун аввал номаълум бўлган Prestige тўлов дастуридан фойдаланган. У зарарланган компьютер тизимидаги барча файлларни сканердан ўтказган ва .txt, .png, gpg кенгайтмалари ҳамда 200 дан ортиқ бошқа кенгайтмали файллар таркибини шифрлаган. Кейин Prestige .enc кенгайтмасини мавжуд файл кенгайтмасига қўшган.

Microsoft дастлаб ҳужумни DEV-0960 деб номланган номаълум гуруҳ билан боғлади, бироқ 10 ноябрь куни бу ҳужумлар ортида Sandworm (Iridium) турганини айтди. 

Prestige дастури ёрдамида хакерлар қурбонлар тармоқларини назоратга олишган. 11 октябр куни хакерлар Prestige’ни барча вирусли қурилмаларга жойлаштирди, дея таъкидлади CNN манбаси. Prestige Украинага гуманитар ёки ҳарбий ёрдамни тўғридан тўғри етказиб берадиган ёки ташийдиган ташкилотлар учун хавф ортиб бораётганидан далолат беради. Кенгроқ қилиб айтганда, бу Шарқий Европадаги ташкилотлар учун катта хавф туғдириши мумкин, сабаби улар, Россия фикрига кўра, Украинага ёрдам беряпти, дея қўшимча қилди у.

Ғарб давлатлари Sandworm ёки Iridium хакерлар гуруҳини 2017 йилда Оқ уй ҳисоб-китобларига кўра, 10 миллиард доллар молиявий зарар келтирган глобал NotPetya киберҳужумига алоқадор деб ҳисоблаяпти. Бундан ташқари, ушбу гуруҳ 2016 ва 2017 йилларнинг энг совуқ ойларида электр таъминотида катта узилишларга сабаб бўлган Украина энергетика тизимига бузиб киришда айбланмоқда.