“Любой” ишни биттада битирадиган” профилактика инспектори жазосиз қолди

Самарқанднинг Паст Дарғом туманида ишловчи профилактика инспектори фуқаронинг “Equinox” автомобилини дабдала қилгани, лекин унга чора кўрилмаётгани ҳақида Kun.uz октябр ойи бошида хабар берган эди.

Ноябр ойи бошида эса Самарқанд вилояти ички ишлар бошқармаси бошлиғи Раҳмат Маматов танқидий йиғилиш ўтказди ва унда 19 нафар профилактика инспектори ишдан олинди. Kun.uz'га маълум бўлишича, ўша йиғилишга паст дарғомлик профилактика инспектори Салоҳиддин Пардақулов ҳам чақиртирилган.

Манбамизга кўра, инспектор Пардақулов бошқага тегишли “Equinox”ни ҳужжатсиз бошқариб, ЙТҲ содир этгани ва зарарни тўлаб бермаётгани учун бошқарма бошлиғи томонидан қаттиқ танбеҳ олган. Инспекторнинг отаси ҳам йиғилишда турғазиб қўйилган.

“Виждонинг бўлса, машиналарнинг зарарини тўлаб бер. Тизим шаънига иснод келтирдинг. Жамоатчиликнинг ҳақли эътирозларига сабаб бўлдинг”, деган Маматов.

Бошқарма бошлиғи профилактика инспекторининг хатти-ҳаракати, ички ишлар органлари ходимларининг одоб-ахлоқ қоидаларини бузгани сабабли масъул ўринбосарларига қонуний қарор қабул қилиш учун топшириқ берган.

Аммо, йиғилишдан ўтганига 10 кундан ошган бўлса-да, зарар ҳам қоплаб берилмаган, инспекторга чора ҳам кўрилмаган.

Эслатиб ўтамиз, Салоҳиддин Пардақулов 2022 йилнинг 20 январ куни ўзи ишлаётган маҳалладаги фуқаронинг машинасини ҳужжатсиз бошқарган. У автомобилда йўл ҳаракати қоидаларини бир неча марта қўпол тарзда бузган. Айнан ЙТҲ содир этилишидан аввалги ҳолатлар ҳам видеорегистраторга ёзиб олинган. Бироқ судда бошқа фуқаро айбдор деб топилган ва “Equinox”га етказилган 62,5 миллион сўм зарарни у тўлаши белгиланган.

Kun.uz манбасига кўра, ИИБ бошлиғи Маматов ҳам асл вазият қандай бўлганини инобатга олиб, профилактика инспекторини мард ва виждонли бўлишга чақирган.