20 ноябр куни Қатарда 22-жаҳон чемпионати баҳслари бошланади. Қатар араб олами ва Яқин Шарқдаги илк мундиалга жиддий тайёрланмоқда.
Фото: Tribuna.uz
Шаҳар кўчаларида жаҳон чемпионатини эслатиб турувчи суратлар жуда кўп. Доҳадаги баланд биноларда машҳур футболчиларнинг суратларини кўриш мумкин. Стадионлар атрофида аста-секин мухлислар кўпая бошлаган. Бугун, 18 ноябрдан бошлаб кўчаларда мухлислар олдинги кунлардагига қараганда кўпроқ.
Ҳозирча Қатар кўчаларида энг кўп Аргентина ва Бразилия миллий жамоаси либосларидаги мухлисларни учратиш мумкин. Уларнинг ҳаммаси ҳам жанубий америкалик эмас, асосан ҳиндистонлик ва бошқа мамлакатдан келганлар шу икки жамоа либосида юришибди.
Мухлисларни асосан шаҳар марказидаги ФИФА мухлислар фестивали ўтадиган ҳудудда, стадионлар олдида ва чипта сотиладиган ерларда учратиш мумкин.
Ўткир Жалолхонов
