Буюк Британия қишда Украинага ёрдам қилишга ваъда берди

Британия ташқи ишлар вазири Клеверли Киевга эълон қилинмаган ташриф билан келди. У Украинага инфратузилмани, айниқса Херсон ва яқинда озод қилинган бошқа ҳудудларни тиклашда ёрдам ваъда берди.

Фото: Reuters

Буюк Британия ташқи ишлар вазири Жеймс Клеверли Украина раҳбарияти билан учрашиш, уларни қишда ва узоқ муддатда қўллаб-қувватлашга ишонтириш учун 24 ноябрь куни эълон қилинмаган ташриф билан Киевга жўнаб кетди, деб хабар берди вазирлик идораси 25 ноябрь, жума куни.

«Бирлашган Қироллик Украина билан елкама-елка туради. Қиш яқинлашар экан, Россия тинч аҳолига, шифохоналарга ва энергетика инфратузилмасига шафқатсиз зарбалар бериб, Украинанинг қарорини синдиришга уринишда давом этмоқда. Россия бунга эриша олмайди. Қўллаб-қувватлашимиз имкон бергунча давом этади. Бу ажойиб мамлакатга бизнинг ёрдамимиз жасур фуқароларга қаршилик кўрсатишга ва вайрон бўлган нарсаларни қайта тиклашга қандай ёрдам беришини шахсан кўрдим», деди Клеверли.

У Украинага муҳим инфратузилмани тиклаш учун уч миллион фунт ва яна беш миллион фунтни Судан ва Яман каби қашшоқ мамлакатларга дон етказиб бериш учун ажратилишини ваъда қилди. Клеверлининг қайд этишича, Лондон ёрдамининг салмоқли қисми Украина жанубидаги яқинда озод қилинган ҳудудларда, жумладан Херсонда инфратузилмани тиклашга сарфланади.

Жеймс Клеверли Украинага Британиянинг янги бош вазири Риши Сунак ташриф буюрганидан бир неча кун ўтиб келди.