Бельгияда жаҳон чемпионатидаги мағлубиятдан кейин тартибсизликлар рўй берди

27 ноябрь, якшанба куни Бельгия миллий жамоаси Қатардаги жаҳон чемпионатида Марокашга 0:2 ҳисобида мағлуб бўлгач, Бельгиянинг бир қанча шаҳарларида, жумладан, пойтахт Брюсселда ҳам футбол мухлислари полиция билан тўқнашувга борди.

Полиция маълумотларига кўра, ўнлаб одамлар Брюссел марказида ғалаён кўтариб, полицияга ҳужум қилган, улар сув пуркагичлар ва кўздан ёш оқизувчи газ билан жавоб берган. Шунга ўхшаш ҳодисалар Льеж ва Антверпенда ҳам содир бўлган.

Бельгия ҳуқуқ-тартибот идоралари вакилларининг сўзларига кўра, финал ҳуштаги чалингунча ҳам, юзларини яширган «ўнлаб одамлар» полиция билан тўқнашув бошлаш учун «фурсат қидираётган» бўлган. AFP маълумотларига кўра, Брюсселда одамлар дўкон ойналарини синдирган, шунингдек, чиқинди қутилари, электр скутерлар ва автомобилни ёқиб юборишган. Қайд этилишича, тўқнашувлар марокашлик мухлислар гавжум бўлган ҳудудларда бошланган.

Тартибни тиклаш учун юзга яқин полициячи ва бир вертолёт жалб қилинган, айрим метро бекатлари ва марказий кўчалар ёпилган. Ҳаммаси бўлиб 11 га яқин киши ҳибсга олинган. Кечга яқин тартибсизликлар тўхтатилди, деди Брюссел мэри.

Бельгия шарқидаги Льеж шаҳрида 50 га яқин киши полиция бўлимига ҳужум қилиб, ойналарини синдириб, икки полиция машинасига зарар етказди. Бунга жавобан ҳуқуқ-тартибот идоралари ходимлари сув пуркагичдан фойдаланган. Антверпенда ҳам шунга ўхшаш ҳодисалар ортидан ўнга яқин одам ҳибсга олинган.

Ўйиндан кейин Нидерландиянинг бир қанча шаҳарларида ҳам тартибсизлик бўлиб ўтди. Роттердам, Ҳаага, Амстердам ва Утрехт полицияси тартибсиз уюштирган марокашлик футбол мухлисларини тарқатиш учун таёқлардан фойдаланган, деб ёзади AFP.