«Вагнер» Африка қамоқхоналаридан маҳбусларни ёллашни бошлади

«Путин ошпази» лақаби билан танилган Евгений Пригожинга тегишли бўлган «Вагнер» хусусий ҳарбий компанияси Марказий Африка Республикасидаги (МАР) қамоқхоналардан одамларни бошқа минтақалар, жумладан, Украинадаги жанговар ҳаракатларда қатнашиш учун ёллашни бошлади. Бу ҳақда The Daily Beast ушбу мамлакатнинг юқори мартабали икки офицерига таяниб ёзмоқда.

Вагнерчилар ўнлаб исёнчиларни, шу жумладан аёллар ва болаларни ўлдириш ва зўрлашда айблаган маҳбусларни ёлламоқда. Уларнинг аксарияти фуқаролар уруши даврида қарийб ўн йил давомида МАР ҳудудининг катта қисмини назорат қилган, тинч аҳолига зўравонлик қилган ва уларни қўрқитган террорчилардир.

«Вагнер» октябр ойида маҳбусларни ёллашни бошлаган. «Ҳеч ким уларни тўхтата олмайди, чунки ҳукумат уларга хоҳлаганча ҳаракат қилиш ҳуқуқини берган», деди офицерлардан бири.

«Вагнерчилар Мали ва Украинада зудлик билан одамлар кераклигини айтишди. Ўйлайманки, биз ушлаб турган 20 дан ортиқ жиноятчи озод қилинди», деди иккинчи манба.

«Вагнер» шу йил ёзда Россия колонияларида маҳбусларни ёллашни бошлаган эди. Евгений Пригожин Россия колонияларидаги маҳбуслар билан шахсан учрашиб, Украинадаги жанговар ҳаракатларда 6 ой қатнашиб берса, озодликка чиқишини ваъда берган.

Пригожиннинг ўзи ҳам аввалроқ ўғрилик, фирибгарлик ва вояга етмаганларни жиноий фаолиятга жалб қилишда айбланиб судланган. Унинг ёлланма аскарлари хориждаги кўплаб операцияларда, асосан (Украинага бостириб киришда бўлгани каби) Россия Давлат разведка бошқармаси қўмондонлиги остида қатнашади. У «Путин ошпази» лақабини олган, чунки Кремлда зиёфатларни уюштирган.