Столтенберг: Украинадаги уруш НАТО билан урушга айланиши мумкин

НАТО бош котиби Украинадаги жанговар ҳаракатлар назоратдан чиқиб кетишидан хавотирда. Бу уруш НАТО ва Россия ўртасидаги кенг кўламли урушга айланиши мумкин, дея огоҳлантирди у.

НАТО бош котиби Йенс Столтенберг Россиянинг Украинада бошлаган уруши Россия ва Шимолий Атлантика альянси ўртасидаги можарога айланиб кетиши мумкинлигидан хавотирда. «Украинадаги уруш даҳшатли. У НАТО ва Россия ўртасидаги кенг кўламли урушга ҳам айланиб кетиши мумкин. Биз бунинг олдини олиш учун ҳар куни ҳаракат қиляпмиз», деди Столтенберг 9 декабрь, жума куни Норвегиянинг NRK телеканалига берган интервьюсида.

Бундан бироз олдин РФ президенти Владимир Путин Россия АҚШга ўхшаб, ўзининг ҳарбий доктринасига ядровий қуролсизлантирувчи зарба бериш ҳуқуқини киритиши мумкинлигини айтганди. 

Олдинроқ The New York Times газетасига берган интервьюсида Йенс Столтенберг Ғарбда Украинани қўллаб-қувватлашдан «чарчаган» ҳамда озиқ-овқат ва энергия нархининг юқорилигидан норози бўлганларни «тушунишини» айтган эди. Шу билан бирга, у Путин Украинада ғалаба қозониб, Ғарб давлатларида эркинлик ва тинчликни хавф остига қўйса, Ғарб «анча қимматроқ нарх тўлашига» тўғри келишини таъкидлади. 

Украинада уруш бошланганидан бери НАТО ва Россия ўртасидаги уруш таҳдиди ҳақида гаплар тўхтамаяпти. Ушбу таҳдид туфайли Ғарб давлатлари Киевнинг Украина осмонини ёпиш ҳақидаги илтимосини бажаришдан бош тортди ва бу давлатга қурол-яроғ етказиб беришни чеклади. Россия расмийлари НАТО бу урушда Украина томонида қатнашаётганини таъкидлайди.

Ноябрь ойи ўрталарида Полшада ракета қулаб, икки киши ҳалок бўлганидан кейин НАТО ва Россия ўртасида уруш хавфи борлиги ҳақидаги хавотирлар кучайди. Аввалига ракета Россия томонидан учирилгани ҳақида хабарлар тарқалди, бироқ кейинчалик Ғарбда бу Украина ҳаво ҳужумидан мудофаа тизими ракетаси эканлиги тан олинди.