Путин: «Бизнинг мақсадимиз — урушни тугатиш»

Россия президенти Владимир Путин Москва Украинадаги урушнинг тезроқ якунланиши тарафдори эканини айтди.

«Бизнинг мақсадимиз — ҳарбий можаро ғилдирагини айлантириш эмас, аксинча, бу урушни тугатиш, биз шунга интилиб келамиз ва бундан кейин ҳам шунга ҳаракат қиламиз», – деган Россия президенти Москвада Кремл пулидаги журналистларга.

У яна бир бор шундай дея таъкидлаган: «Биз бунинг тугашини таъминлашга интиламиз. Албатта, бунинг бажарилиши қанча тез бўлса, шунча яхши».

Ҳарбий ҳаракатлар бориши ҳақида гапираркан, президент қўшимча қилган: «хўш, нима бўлаётгани ва қандай бўлаётганига келсак... Мен аввал ҳам кўп бор гапирганман: ҳарбий ҳаракатларнинг кучайиши оқлаб бўлмайдиган йўқотишларга олиб келади».

Бундан ташқари, Путин Москва АҚШнинг Украинага Patriot тизимини етказиб бераётганини инобатга олишини айтиб, бу қуролга қарши восита топилишига ишонч билдирган.

«Patriot’га келсак, бу жуда эски тизим, айтайлик, бизнинг С-300 каби ишламайди. Аммо, шунга қарамай, бизга қарши бўлганлар бу мудофаа қуроли эканидан келиб чиқади, майли шундай бўлақолсин. Шунчаки биз буни инобатга оламиз», – деган Россия раҳбари «Интерфакс» мухбири саволига жавоб бературиб.

«Ва қарши чора доим топилади», – дея қўшимча қилган у. Унинг фикрича, Америка томонидан етказиб берилиши ваъда қилинган ҳаво ҳужумидан мудофаа қуроллари Украинадаги можарони фақат кучайтиради. «Буни қилаётганлар бекор бундай қиляпти. Бу шунчаки можарони узайтириш, тамом вассалом», – деган Путин.

У шунингдек Россия Украина билан тинчлик музокараларини рад этмаслигини таъкидлади.

«Барча қуролли можаролар у ёки бу тарзда дипломатик майдондаги қандайдир музокаралар билан тугайди. Биз эса ҳеч қачон музокарани рад этганимиз йўқ. Украина раҳбарияти музокара олиб боришни ўзига тақиқлаган», – деган Россия раҳбари.

Унинг фикрича, бу анча ноодатий ва ҳатто ғалати кўринади. «Шунга қарамай, эртами-кечми, албатта, зиддиятли вазиятда бўлган ҳар қандай томонлар ўтириб, келишиб олади. Бу бизга қарши чиққанларга қанчалик тез етиб борса, шунча яхши. Биз бундан ҳеч қачон бош тортмаганмиз», – деди у.

• Маълумот учун, Россия ҳукумати Украинадаги ҳарбий ҳаракатларни ифодалашда «махсус ҳарбий амалиёт» иборасини қўллайди. Мамлакатда бу амалиётни «уруш» деб аташ учун жавобгарлик кўзда тутилган. Путин бу сафарги чиқишида 2014 йилда Донбассда бошланган можарога нисбатан илк бор «уруш» сўзини қўллади.