«Ўзгидромет» Тошкент вилояти Бўстонлиқ туманидаги Чотқол тизмасининг Чимён тоғларида 2—4 январ кунлари қор кўчиш хавфидан огоҳлантирди.
Фото: Youtube / Manzil
«Тоғли ҳудудларда яшовчи фуқаролар, ҳамда дам олувчилар ва тоғли ҳудудларда ҳаракатланаётган ҳайдовчилардан эҳтиёт чораларини кўришларини сўраймиз», — дейилади марказ хабарида.
2 январдан Ўзбекистон ҳудудига Кавказ минтақаларидан нам ҳаво оқимининг кириб келиши кутилмоқда. 2−3 январ кунлари республика бўйлаб шамол тезлиги 17−22 м/с.гача кучайиши, Навоий ва Жиззах вилоятларининг айрим туманларида 25−30 м/с.гача етиши мумкин.
3−4 январ кунлари Ўзбекистон ҳудудида ёғингарчилик (ёмғир, қор) ёғади, тоғ олди ва тоғли ҳудудларда кучли ёғингарчилик бўлади.
