Россия Харкивга Германия ташқи ишлар вазири Анналена Бербокнинг шаҳарга кутилмаганда келганидан бир неча соат ўтиб зарба берди. Бу ҳақда вилоят ҳарбий бошқармаси бошлиғи Олег Синегубов маълум қилди.
Фото: AP
Унинг сўзларига кўра, ҳозир шаҳарда портлаш овозлари эшитилмоқда. Маҳаллий аҳолидан бошпаналарни тарк этмаслик сўралган.
Германия ташқи ишлар вазири Анналена Бербок Украинанинг Харкив шаҳрига эълон қилинмаган ташриф билан борди.
Унга Украина ташқи ишлар вазири Дмитрий Кулеба ва Украинанинг Германиядаги элчиси Алексей Макеев ҳамроҳлик қилди. Ташриф хавфсизлик нуқтайи назаридан сир тутилди.
Анналена Бербок Германия Вазирлар Маҳкамасининг феврал ойидан бери Шарқий Украинага ташриф буюрган биринчи аъзоси бўлди, деб қайд қилди Stuttgarter Nachrichten.
Ташриф чоғида вазир кўпроқ қурол-яроғ ва шунингдек, мамлакатнинг Европа Иттифоқига қўшилишига ёрдам берадиган «аниқ таклифлар»ни ваъда қилди.
