Калифорнияда оммавий қотилликда гумонланувчи шахс ўлдирилди

Лос-Анжелес яқинидаги Монтерей-Паркда Ой календари бўйича янги йилни нишонлаш чоғида ўн кишини ўлдиришда гумон қилинган шахс қўлга олиш амалиёти чоғида ўлдирилди. Бу ҳақда Лос-Анжелес округи шерифи Роберт Луна 22 январь, якшанба куни хабар берди.

Шерифнинг сўзларига кўра, эркак ўзига ўқ узганидан вафот этган. Гумонланувчи 72 ёшли Хуу Цан Тран эканлиги аниқланган. Дастлаб у қочишга муваффақ бўлган, бироқ бир неча соат ўтгач, полиция гувоҳларнинг кўрсатмаларини тўплаб, оқ фургонда кетаётганини аниқлаб, уни қидирувга берган.

Таърифга мос келадиган машина Калифорниянинг Торранс шаҳрида топилди. Гумонланувчини қўлга олмоқчи бўлишганида, у катта эҳтимол билан ўзини отиб ўлдирган, дея хабар беради CNN манбалари.

22 январь, якшанбага ўтар кечаси Лос-Анжелес яқинидаги Монтерей-Паркда жойлашган тунги клубда эркак киши ўт очди. Оқибатда 10 киши ҳалок бўлди, яна 10 киши тан жароҳати олди. Ҳужум ой тақвимига кўра янги йилни нишонлаш вақтида содир бўлган. Кўчаларда асосан осиёлик бўлган ўн минглаб одамлар йиғилган. 60 мингга яқин аҳолига эга Монтерей-Парк Лос-Анжелесдан 16 километр узоқликда жойлашган.

Клубдаги отишмадан тахминан 20 дақиқа ўтгач, яқин атрофдаги Алхамбра шаҳрида рақс залига қуролланган эркак кирган, бироқ у ердагилар ундан ўқотар қуролини тортиб олган, шундан сўнг у қочиб кетган, деди шериф. Терговчиларга кўра, иккала ҳолатда ҳам гап бир шахс ҳақида боряпти. Полиция ҳужумчидан олинган қуролларни излаб, эркакнинг шахсини аниқлашга муваффақ бўлди. Бундан ташқари, ҳуқуқ-тартибот идоралари микроавтобусидан уни иккита жиноят жойига боғловчи далилларни топди.

Калифорниядаги отишма сўнгги пайтларда қурбонлар сони бўйича энг оммавий отишмалардан бирига айланди, деб таъкидлайди The Los Angeles Times. Жиноятчининг мақсади номаълум. АҚШ президенти Жо Байден ҳалок бўлганлар ва жароҳатланганларнинг оила аъзоларига ҳамдардлик билдирди, шунингдек, бутун мамлакат бўйлаб байроқларни тушириб қўйишни буюрди.