Калифорния губернатори Европа сиёсатчиларини Трампга нисбатан дадил позиция эгаллашга чақирди

Калифорния штати губернатори Гэвин Нюсом Давосда ўтаётган Жаҳон иқтисодий форумида журналистлар билан мулоқот қилиб, Европа сиёсатчиларини Трампга нисбатан дадил позиция эгаллашга чақирди.

“[Европа учун] қаддини тик тутиш вақти келди. Жиддийлашадиган, лапашанг шерик бўлишни бас қиладиган пайт келди. Гавдани ростлаб, мустаҳкам туриш, “умуртқали бўлиш” вақти келди. АҚШда кўриб турибман: Конгресс бўшанглик қиляпти, иккала томонга ҳам “ўйнаяпти”. Ҳозир – принципни ушлайдиган, кучли бўладиган, бирлашадиган пайт”, – деди Демократик партия вакили.

Нюсом Европа етакчилари ва умуман дунё сиёсатчиларининг Трампга муносабатини яна бир бор “лапашанглик” деб атаркан, улар Трампга “ялтоқланиш”ни бас қилиши кераклигини айтди.

“Бунақанги лапашанг бўлишларини тушуна олмайман. Унга бир оғиз ҳам қарши гапиришмаяпти. Бу ерга жаҳоннинг ҳамма етакчилари учун тиззани асрайдиган прокладкалардан бир қути олиб келишим керак экан... Унга тожлар кийдиришяпти... Нобел мукофотларини бериб юборишяпти... Бу – ялтоқилик. Бу – шунчаки шармандалик.

Умид қиламанки, улар жаҳон саҳнасида қанчалик шармандали кўринаётганликларини ўзлари тушунишади. Энг камида Америка томондан туриб қараганда, бу – шармисорлик. Европаликлар ўзи учун ўзи қарор қабул қилиши керак”.

Калифорния губернатори журналистнинг: “Европа дипломатия қиляпти” деган таъкидига қўшилмаслигини билдирди.

“Доналд Трамп билан дипломатия? У – тираннозавр. Ё сиз у билан жангга чиқасиз, ёки у сизни ямламай ютади. Ё униси, ё буниси. Европаликлар бошини баланд кўтариши, қатъиятли ва жипс бўлишлари керак”.

Трампнинг сиёсати Европа Иттифоқининг парчаланишига сабаб бўлиши мумкинми, деган саволга жавобан Нюсом АҚШ президентини кучли зарб билан тепилган бузғунчи тўпга ўхшатди.

“Бу масалада муболаға қилишни истамайман, лекин бу одам – ҳаммаёқни вайрон қиладиган копток. Умид қиламанки, одамлар уйқудан уйғониб, биз нимага рўбарў келиб турганимизни тушунади. Бу – фавқулодда ҳолатнинг айни ўзгинаси”.

Калифорния губернаторининг бу гапларидан кейин, Оқ уй унинг Давос форумида спикер сифатидаги иштирокини блоклаб қўйди. Трампнинг матбуот хизматига кўра, Гэвин Нюсомдек “учинчи даражали губернатор”ни Давосда “ҳеч ким танимайди”, у Швейцарияга келиб “ялло қилиб юришдан кўра, Калифорнияда ўзи яратган муаммоларни ҳал қилиш билан шуғулланиши” керак.

• Маълумот учун, агар Калифорния штати алоҳида давлат бўлганида, ялпи ички маҳсулотининг ҳажми бўйича дунёдаги тўртинчи энг катта иқтисодиёт бўлган бўларди.