Россия Мюнхен хавфсизлик конференциясига таклиф қилинмади

Форум ташкилотчилари Россия вакилларига ташвиқот майдончаси беришни истамади. Конференцияга унинг ўрнига мухолифатчилар Гарри Каспаров ва Михаил Ходорковский таклиф қилинди.

Кристоф Хойсген / Фото: Reuters

Бу йил Мюнхен халқаро хавфсизлик конференциясига Россия ҳукумати вакиллари таклиф қилинмаяпти, деб маълумот берди конференция раиси Кристоф Хойсген 1 февраль, чоршанба куни MDR телеканалига берган интервьюсида. У буни Россия президенти Владимир Путиннинг тарғиботи учун хавфсизлик масалалари бўйича нуфузли халқаро форумда платформа тақдим этишни истамаслиги билан изоҳлади.

«Кремлдан биз ҳар куни эшитаётган баёнотлар Россия Путин уруш мақсади деб эълон қилган нарсадан, яъни Украинани йўқ қилишдан бир зарра ҳам чекинади, деган хулосага келишимизга имкон бермайди», деб тушунтирди Хойсген. Унга кўра, ҳукумат амалдорлари ўрнига Россиядан фуқаролик жамияти ва мухолифат вакиллари, жумладан шахмат бўйича собиқ жаҳон чемпиони Гарри Каспаров ва олигарх Михаил Ходорковский таклиф қилинган.

Аввалроқ собиқ канцлер Ангела Меркелнинг ташқи сиёсат бўйича маслаҳатчиси бўлиб ишлаган Хойсген Германиянинг Украинани қўллаб-қувватлашини ҳимоя қиляпти.

«Путин охир-оқибат совет иттифоқини қайта тиклашни хоҳлашини аниқ айтди. Агар Россия президенти Украинада муваффақият қозонса, у Болтиқбўйи мамлакатларига ҳам бостириб киради. Бу давлатлар НАТОга аъзо бўлгани учун Германияга, иттифоқчилик мажбуриятларига бевосита таъсир қилади. Бунинг олдини олиш керак, шунинг учун Украинага ёрдам бериш керак», деди Кристоф Хойсген.

Халқаро Мюнхен хавфсизлик конференцияси 17 февраль куни очилади.