FT: Рубио Мюнхен конференциясидаги нутқида Россия ва Украинани бир марта ҳам тилга олмади

Германиялик дипломатнинг фикрича, АҚШ давлат котибининг нутқи европаликларни қизиқтирган мавзулардан кўра кўпроқ Американинг ички масалаларига бағишланган.

Фото: AP

АҚШ давлат котиби Марко Рубионинг хавфсизлик бўйича Мюнхен конференциясидаги чиқиши айримлар томонидан совуқ кутиб олинди, деб ёзади Financial Times (FT) газетаси.

"Бу биз кутган жавоб эмас", - деган нашрга немис дипломатларидан бири.

Унинг сўзларига кўра, нутқ европаликларни қизиқтирган мавзулардан кўра кўпроқ Американинг ички масалаларига бағишланган. Яна бир европалик мансабдорнинг қайд этишича, нутқ Make America Great Again (MAGA, "Американи яна буюк қиламиз") ҳаракати руҳида бўлган.

"Россия бирор марта тилга олинмади, Украина бирор марта тилга олинмади", - деган у.

Financial Times шунингдек, Берлиндаги Фан ва сиёсат фонди сиёсатшуноси Пия Фурхопнинг фикрларини келтирган.

"Бу заҳарланган совға", - деган у АҚШ давлат котибининг ҳамкорликда ишлаш тўғрисидаги чақириғи ҳақида фикр билдираркан.

Рубио Мюнхен конференциясидаги чиқишида АҚШ ўзини ҳимоя қила олмайдиган заиф иттифоқчиларни хоҳламаслигини ва Вашингтондагилар кучли Европани кўришни исташини таъкидлаган.