Фото: Қирғизистондан Ўзбекистонга олиб ўтувчи ноқонуний туннеллар аниқланди

Андижонда Қирғизистондан ноқонуний олиб ўтувчи 2 та ерости йўли аниқланди. Ҳар иккисининг эни 60 см, баландлиги 1,5 метр, узунлиги тахминан 150−200 метрга тенг.

Фото: Давлат хавфсизлик хизмати

Андижон вилояти Қўрғонтепа туманида Қирғизистондан ноқонуний олиб ўтувчи ерости йўллари аниқланди. Бу ҳақда Давлат хавфсизлик хизмати хабар бермоқда.

Қайд этилишича, 3 ва 9 феврал кунлари Ўзбекистон ДХХ ва Ички ишлар вазирлиги томонидан тезкор тадбирлар олиб борилган. Жараён давомида Қирғизистоннинг Ўш вилояти Қорасув тумани ҳудудидан Ўзбекистон давлат чегараси орқали Андижон вилояти Қўрғонтепа тумани ҳудудига олиб кирувчи, ҳар бирининг эни 60 см, баландлиги 1,5 метр, узунлиги тахминан 150−200 метрли иккита ерости йўллари мавжудлиги аниқланган.

Ҳозирда бу ҳолатлар юзасидан Жиноят кодексининг 223-моддаси (Қонунга хилоф равишда чет элга чиқиш ёки Ўзбекистон Республикасига кириш) билан қўзғатилган жиноят иши доирасида суриштирув ишлари олиб борилмоқда.