АҚШ ва Россия ўртасидаги 2021 йилги қисқа муддатли «илиқлик» даврида иккала давлат раҳбари совға алмашган.
Россия президенти Владимир Путин 2021 йилда Женевада бўлиб ўтган биринчи президентлик саммитида АҚШ президенти Жо Байденга 12 минг долларлик ручка ва канцелярия тўпламини совға қилган.
Bloomberg нашрининг ёзишича, совға алмашинуви 2021 йил июн ойида бўлиб ўтган 2,5 соатлик Женева саммитида юз берган. Бу ҳозирда АҚШ-Россия муносабатларидаги сўнгги қисқа муддатли «илиқ давр» сифатида баҳоланмоқда. Украина босқини бошлангач, муносабатлар кескин ёмонлашди.
Нашрнинг қайд этишича, канцелярия тўплами ўша йили Байденга берилган энг қимматбаҳо совға бўлган.
АҚШ президенти бунга жавобан Путинга ўзининг севимли қора «авиатор» кўзойнакларидан бир жуфтини ва бизоннинг шиша ҳайкалчасини совға қилган. Бу ҳақда Оқ уй хабар берган эди. Бироқ, Путиннинг совғаси ҳақидаги маълумотни Оқ уй ҳам, Кремл ҳам ошкор қилмади.
Байденнинг Путинга совғаси қиймати хабарда келтирилмади.
Украина президенти Владимир Зеленский 2021 йилда Байденга 700 долларлик АҚШ байроғини совға қилган.
Қўшма Штатларда давлат раҳбари ва юқори лавозимли бошқа шахслар томонидан олинган совғалар ҳисоботи анъанавий тарзда эълон қилиб борилади. Қимматбаҳо совғаларнинг аксарияти одатда АҚШ Миллий архив ва ҳужжатлар бошқармасига (NARA, National Archives and Records Administration) топширилади. Аммо истиснолар ҳам бўлади. Мулозимлар совға қийматини ўз ҳисобидан давлатга тўлаб, уни ўзида қолдириш ҳуқуқига ҳам эга.
