Конституциявий қонун лойиҳаси 6 турдаги экспертизадан ўтказилди

Қонунчилик палатасининг Конституциявий қонун лойиҳасини тайёрлашга масъул бўлган Коррупцияга қарши курашиш ва суд-ҳуқуқ масалалари ҳамда Демократик институтлар, нодавлат ташкилотлар, фуқароларнинг ўзини ўзи бошқариш органлари қўмиталарининг қўшма йиғилиши бошланди.

Жаҳонгир Ширинов / Фото: Kun.uz

Коррупцияга қарши курашиш ва суд-ҳуқуқ масалалари қўмитаси раиси Жаҳонгир Шириновнинг сўзларига кўра, 2022 йил 24 ноябрь куни Қонунчилик палатаси мажлисида сиёсий партиялар фракциялари томонидан Конституциявий қонун лойиҳаси юзасидан илгари сурилган қатор таклифлар ҳам янгиланаётган Конституция матнида акс эттирилган.

“Хусусан, давлат ҳокимияти ва бошқаруви органларининг ваколатларини аниқлаштиришга, шунингдек уларнинг ҳамкорлик механизмларини янада такомиллаштиришга, жамоатчилик, парламент ва депутат назорати механизмларини такомиллаштиришга, ижтимоий давлат принципларини рўёбга чиқаришнинг конституциявий механизмларини кучайтиришга қаратилган нормалар киритилди”, деди у.

Маълум қилинишича, Конституциявий қонун лойиҳаси 6 турдаги экспертизадан, жумладан: лингвистик, юридик, гендер-ҳуқуқий, коррупцияга қарши, жамоатчилик ҳамда инсон ҳуқуқлари бўйича нормаларга мувофиқлиги бўйича экспертизалардан ўтказилган.