АҚШ Конгресси спикери Киевга бориш таклифини рад этди

АҚШ Конгресси Вакиллар палатаси спикери Кевин Маккарти Украинага бориш ниятида эмаслигини айтди. Шундай қилиб, у Украина президенти Володимир Зеленскийнинг ушбу мамлакатдаги вазият билан шахсан танишиш мақсадида Украинага келиш таклифига жавоб берди. 8 март, чоршанба куни кечқурун Американинг CNN телеканали эфирида Маккарти Зеленскийнинг таклифи ҳақидаги саволга жавоб берар экан, Киевга бориши шарт эмаслигини ва маълумотни бошқа йўллар билан олишини айтди.

Володимир Зеленский ўша каналдаги интервьюсида Кевин Маккартига Украинага ташриф буюришни таклиф қилди ва Вакиллар палатаси спикерининг Киевга ёрдам бўйича «лимитсиз чеклар» ҳақидаги сўзларига изоҳ берди. «Жаноб Маккарти бизнинг қандай ишлаётганимизни, бу ерда нима содир бўлаётганини, уруш бизга нималар келтириб чиқарганини, ҳозир одамлар қандай курашаётганини, ҳозир ким курашаётганини кўриш учун бу ерга келиши керак. Кейин ўз тахминларини айтиши лозим», деди Украина давлати раҳбари.

Зеленскийнинг таклифини рад этган Маккарти бир вақтнинг ўзида АҚШ президенти Жо Байден маъмуриятини Киевга етарлича тез ёрдам бермагани учун танқид қилди. «Мен аниқ айтаман: лимитсиз чеклар бўлмайди. Шу нуқтайи назардан, лимитсиз чек қаерда кераклиги ва қаерда керак эмаслигини тушуниш учун Украинага боришим шарт эмас», деди конгрессмен. Шу билан бирга, Маккарти, ўз сўзлари билан айтганда, Украинани қўллаб-қувватлашни давом эттиради. 

CNN таъкидлаганидек, Қўшма Штатларда ҳар икки партия конгрессменлари - демократлар ҳам, республикачилар ҳам Украинани қўллаб-қувватламоқда. Бироқ ҳозирда республикачилар кўпчиликни ташкил этган Вакиллар палатасида уларнинг баъзилари Киевга ҳарбий ва молиявий ёрдамни тўхтатишни талаб қиляпти.