Rheinmetall Украина техникасини таъмирлаш учун база очади

Таъмирлаш ва логистика маркази Украина чегараси яқинида жойлашган бўлиб, Германиянинг Leopard, Британиянинг Challenger танклари, Marder пиёдалар жанговар машинаси ҳамда Германиянинг Fuchs зирҳли транспортёрларига, шунингдек, ҳарбий юк машиналарига хизмат кўрсатади, дея хабар бермоқда Reuters компаниянинг ўзига таяниб. 

База апрел ойида иш бошлайди. «НАТО ва Украина қўшинларини энг яхши ёрдам билан таъминлаш Rheinmetall'дагилар учун асосий вазифадир», - деди мудофаа концерни раҳбари Армин Паппергер.

Аввалроқ Германиянинг Rheinmetall қурол концерни Украинада танк заводи қуриш бўйича музокаралар олиб бораётгани маълум бўлганди. Бу ҳақда Rheinmetall бош директори Армин Паппергер 4 март куни Rheinische Post газетасига берган интервьюсида айтган.

«Тахминан 200 миллион евро эвазига Украинада йилига 400 тагача Panther танклари ишлаб чиқарадиган Rheinmetall заводини қуриш мумкин. Украина ҳукумати билан музокаралар истиқболли ва умид қиламанки, бу борада қарор кейинги икки ой ичида қабул қилинади», деди Паппергер. 

Урушда ғалаба қозониш учун Украинага 600 тадан 800 тагача танк керак ва бу эҳтиёжни қондириш учун ишлаб чиқаришни зудлик билан йўлга қўйиш керак, деб ҳисоблайди эксперт. Унинг фикрича, Украина ҳаво ҳужумидан мудофаа тизимлари ёрдамида заводни Россия ҳужумларидан ҳимоя қилиш «қийин бўлмайди». 

«Германия Киевга Бундесвердаги барча 300 та Leopard 2 танкини топширса ҳам, уларнинг сони жуда оз бўлади», - дея қўшимча қилди Армин Паппергер.