Ҳарбий эксперт: Украина октябр ойидаёқ ғалаба қозонади

Россия армияси шу қадар аянчли аҳволдаки, у шу йил октябр ойидаёқ Украинада мағлубиятга учрайди. Бу фикрни 4 апрел куни Германиянинг «Иккинчи» телеканалига берган интервьюсида Цюрих олий техник мактаби қошидаги Ҳарбий академияда дарс берувчи ҳарбий ва иқтисодий эксперт Маркус Койп айтиб ўтди. 

Унинг сўзларига кўра, Украинадаги жангларда Россия аллақачон 10 мингга яқин оғир ҳарбий техника ва танкларни йўқотган. Бундай йўқотишлар кўлами билан Россия узоққа бора олмайди. «Аслида уларнинг (Россия армиясининг) захиралари тугаши вақт масаласи», — деди Койп. 

Россиянинг қишки ҳарбий кампанияси натижаларини шарҳлар экан, эксперт уларни «фалокатли» деб атади. Унинг сўзларига кўра, оммавий ахборот воситалари фақат Бахмут атрофидаги вазиятга эътибор беришяпти, аммо Россия яна тўртта йўналишда - Креминний, Авдийивка, Маринка, Вуҳледарда ҳужум қилишга уринган. «Бунинг ҳарбий мантиққа ҳеч қандай алоқаси йўқ, - дейди Маркус Койп. - Бу минимал олға силжиш йўлида моддий ва инсоний захираларни йўқотишдир».

Эски Т-55 ва Т-64 танкларининг Россияда қайта фойдаланишга олиниб, фронтга жўнатила бошланганини немис ҳарбий эксперти «технологик регрессиянинг кучайиши» деб атади. 2014 йилда тақдим этилган Т-14 «Армата» танки эса ҳозиргача фақат ҳарбий парадларда кўрилган, аммо Украинадаги жанг майдонида пайқалмади, деди Койп. 

Фронтдаги вазият ва Россия ҳарбий-саноат комплексининг имкониятларини таҳлил қилгандан сўнг, ҳарбий иқтисод бўйича мутахассис октябр ойигача Россия армиясининг захиралари тугайди, деган хулосага келди. Кейинги ҳарбий ҳаракатлар ҳақида эса гап бўлиши мумкин эмас, деб қўшимча қилди у. 

Украина армияси, унинг таъкидлашича, эски совет ҳарбий техникасидан замонавий ғарб техникаларига, хусусан, танклар ва зирҳли транспортёрларга - Американинг Bradley ва Германиянинг Marder’ига муваффақиятли ўтмоқда. Ушбу технологик устунлик Украина қарши ҳужуми пайтида ўзини намоён қилади, Койп бу апрел ойининг ўрталарида бошланишини кутмоқда.