Литва ТИВ: Беларусдаги ядро қуроли НАТО саммитига тайёрланяпти

Путин ва Лукашенконинг ядровий таҳдидлари фонида Болтиқбўйи мамлакатлари ҳар қандай ҳарбий ҳаракатлар олдини олиш учун НАТОдан кўпроқ қўшин, ҳаво мудофаа тизимлари ва бошқа жиддий қадамларга муҳтож, дея маълум қилди Вилнюс.

Габриэлюс Ландсбергис / Фото: AP

Россиянинг Беларусда тактик ядро қуролини жойлаштириш таҳдиди ва бу қадам учун Москва томонидан белгиланган муддат 11-12 июл кунлари Вилнюсда бўлиб ўтган НАТО саммити вақтига тўғри келади. Бу ҳақда Литва ташқи ишлар вазири Габриэлюс Ландсбергис 4 апрел, сешанба куни Шимолий Атлантика иттифоқи мамлакатлари ташқи ишлар вазирларининг Брюсселда бўлиб ўтган йиғилишида айтиб ўтди.

«Бу шунчаки риторика эмас, - деди у. - Июлда нима бўлади? Вилнюсдаги НАТО саммити. Улар Вилнюсда эркин дунё барча етакчилари йиғилганида, бир неча километр нарида қандайдир эски ракеталар судраб юрилишини хоҳлаяпти. Бу, албатта, биз учун сигналдир».

Вазир таъкидлашича, у аввалроқ «Калининградга маълум жиҳозлар олиб келинганини» билган. «Бу биз ядро қуроли яқин атрофдалиги ҳақиқатга айланган муҳитда эканлигимизни англатади», деди у. Ландсбергисга кўра, Болтиқбўйи минтақасидаги вазият ҳар қандай ҳарбий ҳаракатни тўхтатиш учун НАТО томонидан жиддий қадамлар қўйишни талаб қилади.

У НАТОнинг Мадриддаги сўнгги саммитида иттифоқчилар томонидан қабул қилинган мажбуриятларни эслатди. «Бизга Болтиқбўйида кўпроқ қўшинлар, кўпроқ ҳаво ҳужумидан мудофаа тизимлари керак бўлиб, ядро қуроли ҳақида гапираётган ҳар бир кишига бунга жиддий ёндашамиз, деган аниқ сигнал беришимиз керак», деди Литва вазири.

Ландсбергис Беларусда содир бўлаётган воқеаларнинг алоҳида аҳамиятига ишора қилди: «Биз, албатта, у ўз суверенитетини йўқотаётганини ва бу тез содир бўлаётганини тан олишимиз керак. Ҳозирда у жуда чекланган суверенитетга эга бўлган давлатдир».

Ландсбергис Украинанинг альянсга қўшилишини «жуда қийин мавзу» деб атади, лекин Вилнюсдаги саммитда «Украинани НАТОга яқинлаштириш, вақти келганда аъзо бўлиши учун» йўл топилишига умид билдирди. У 2008 йилги Бухарест меморандумини бошланғич нуқталардан бири деб атади, унда Украина, Киев сўровига зид равишда, НАТОга аъзолик бўйича ҳаракатлар режаси билан таъминланмаган. Литва Ташқи ишлар вазирлиги раҳбари мамлакатлар бу борада келишувга эришиб, кейинги қадамни қўйишига умид билдирди.