Кичик Роберт Кеннеди Оқ уй учун Байденга рақиблик қилади

69 ёшда бўлган кичик Кеннеди - ўлдирилган сенатор Роберт Ф. Кеннедининг ўғли, суиқасд қурбонига айланган президент Жон Ф. Кеннедининг жияни ҳисобланади.

Президентликка номзоднинг ҳужжатлари рўйхатга олинганини унинг сайлов кампанияси вакили Жон Салливан тасдиқлаган.

Кеннеди - маълумоти бўйича ҳуқуқшунос - атроф муҳит ҳимоячиси ва вакцинацияга қаршилиги билан маълум. 2021 йилда Instagram маъмурияти унинг аккаунтини ўчириб юборганди, бу у ерда «бир неча бор ёлғон маълумот жойлаштирилгани» билан изоҳланганди.

Президентликка номзодни танлаш учун Демократик ва Республикачилар партиялари ўч ички сайловларини (праймериз) ўтказишади. Кеннеди - демократлар номзодлари орасида янги фигура ва унинг имкониятлари унчалик юқори баҳоланмаяпти.

АҚШ президенти Жо Байден бир неча бор иккинчи муҳлатга номзодини қўйиши ҳақида гапирган, аммо ҳозирча ўз номзодини расман илгари сурмади.

Аввалига у сайловолди пойгасини апрел ойида бошлаши тахмин қилинганди, аммо, унинг ёрдамчисининг сўзларига кўра, кампанияни бошлаш кейинга қолдирилган.

CBS News телеканали хабар қилишича, Байден катта эҳтимол билан ўз номзодини ёз бошида расман эълон қилади.

Март ойида президентлик пойгасига демократлардан яна бир номзод - ёзувчи Марианна Уильямсон қўшилганди. Унинг учун бу Оқ уйга киришга бўлган иккинчи уринишдир: 2019-2020 йилларда у демократлар праймеризида қатнашиш учун рўйхатдан ўтганди, аммо якунда Берни Сандерснинг номзодини қўллаб-қувватлашга қарор қилганди.

Март ойида кичик Кеннеди ҳам 2024 йилги сайловларда иштирок этиши мумкинлигини айтиб, твиттердаги саҳифасида ўз сайловолди дастурини қисқача баён қилганди.

«Агар мен номзод бўлсам, бу фақат битта мақсад учун бўлади - давлат ҳокимиятининг хусусий корпорациялар билан коррупцион бирлашувига барҳма бериш учун. Чунки бу бизнинг иқтисодиётимизни бузади, ўрта синфни йўқ қилади, атроф муҳитни ифлослантиради, болаларимизни заҳарлайди ва бизни эркинликларимиздан маҳрум этади ҳамда қадриятларимизга таҳдид солади», деб ёзганди у.

Нью-Ҳэмпширда ўз тарафдорлари билан учрашувда Кеннеди «энг катта тўсиқни енгиб ўтишга муваффақ бўлгани»ни айтди - рафиқаси сайловларда иштирок этишига розилик билдирган.

Атроф муҳит ҳимояси бўйича юридик фирма ҳаммуассиси сифатида Кеннеди экологик лойиҳаларда иштирок этган - хусусан, Нью-Йоркда Гудзон дарёсини тозалаш ишларида.

У шунингдек вакцинация бўйича скептик қарашлари билан ҳам машҳур - бу масалада у ҳатто ўз оиласи билан жиддий келишмовчиликка борган: 2021 йилда унинг синглиси, Керри Кеннеди, унинг бу масаладаги позициясини «жуда хавфли» деб атаганди.

2019 йилда эса Кеннедилар оиласининг уч вакили Politico нашри учун биргаликда ёзган мақоласида унинг эмлаш амалиёти бўйича позициясини танқид қилишганди.

Унинг яна бир синглиси Кэтлин Кеннеди Таунсенд, шунингдек акаси Жозефа П. Кеннеди II ва қариндоши Мэв Кеннеди Маккин муаллифлигидаги мазкур мақолада кичик Робертнинг қарашлари «фожиали даражада хатолиги» ва «ўлимга олиб келадиган оқибатлар»га эга бўлиши мумкинлиги айтилади.

2022 йилда Facebook ва Instagram кичик Кеннеди томонидан очилган Children's Health Defense («Болалар соғлиги ҳимояси») гуруҳини компаниянинг тиббий масалалар бўйича дезинформация сиёсатини қайта-қайта бузгани учун ўчириб ташлаганди.

Кичик Кеннеди вакциналарга коронавирус пандемиясидан олдин ҳам шубҳа билан қарарди, аммо айнан пандемия даврида катта аудиторияга эга бўлди: 2020 йилда Children's Health Defense даромади икки баравар ортиб, 6,8 млн долларга етди.

Кеннеди шунингдек «Ҳақиқий Энтони Фаучи» номли китоб ёзган, унда АҚШ юқумли касалликлар агентлигининг собиқ раҳбарини «Ғарб демократиясига қарши тарихий қўзғолон»да айблаган.

Ўтган йили Вашингтонда вакциналар хавфлилиги тўғрисида қилган чиқишида у нацистлар Германияси тажрибасига тўхталиб ўтганди.

Кичик Кеннеди спазматик дисфониядан (вокал мушаклари бузилиши, овоз бузилиши) азият чекади.

У 2014 йилда актриса Шерил Ҳайнсга уйланган. Жуфтлик Лос-Анжелесда яшайди.