G7 Россияга қарши санкцияларга риоя этилиши устидан назоратни кучайтиради

«Катта еттилик» мамлакатлари ташқи ишлар вазирлари Россияга қарши санкцияларга риоя этилиши устидан назоратни кучайтириш ва учинчи давлатлар томонидан Россияга қурол етказиб берилишига самаралироқ қарши туришга келишиб олдилар. 17 апрель, душанба куни Нагано яқинидаги Япониянинг Каруизава шаҳрида бўлиб ўтган йиғилиш иштирокчилари Украинага қарши кенг кўламли уруш бошлаган мамлакат томонидан санкциялардан қочиш ва янги қуролларни қўлга киритишнинг олдини олиш бўйича мувофиқлаштириш ишлари кучайтирилганини эълон қилди. 

«Катта еттилик»да раислик қилаётган Япония Ташқи ишлар вазирлиги эълон қилган баёнотда Киевни кучли қўллаб-қувватлаш ва Москвага нисбатан санкциялар босимини давом эттириш нияти таъкидланган. G7 ташқи ишлар вазирлари Россияни «зудлик билан ва ҳеч қандай шартларсиз» Украинадан қўшин ва ҳарбий техникани олиб чиқиб кетишга чақирди. Улар Беларусда тактик ядро қуроллари жойлаштирилишини эълон қилган Россия президенти Владимир Путиннинг ядровий риторикасини қабул қилиб бўлмас, деб атади. 

Япония ташқи ишлар вазири Ёшимаса Хаяши «катта еттилик» ва ҳамфикр давлатлар Украинага ёрдам бериш бўйича биргаликдаги саъй-ҳаракатларда бирдамлик кўрсатиши кераклигини таъкидлади. Унинг сўзларига кўра, ҳозир дунё «тарихий бурилиш нуқтасида». «Катта еттилик» давлатлари Россияга қарши санкциялар сиёсатини қўллаб-қувватламаётган глобал жанубдаги ривожланаётган давлатлар билан ҳамкорлик қилишга интилмоқда, деди у. 

Шу билан бирга, йиғилиш иштирокчилари халқаро тартибни зўрлик билан ўзгартиришга уринишлардан огоҳлантирди. «Биз статус-квони куч билан ўрнатишга қаратилган ҳар қандай бир томонлама уринишларни рад этамиз», — деди Хаяши. Унинг таъкидлашича, «катта еттилик» қонун устуворлигига асосланган халқаро тартибни қўллаб-қувватлашга қатъийликни намойиш этади. Баёнот шунингдек, G7’нинг Хитой ва Шимолий Кореядан келаётган таҳдидларга нисбатан қаттиқ позициясини тасдиқлайди.