Брюссел Украинадан импорт билан боғлиқ муаммога ечим тақдим этди

Еврокомиссия раҳбари Урсула фон дер Ляйен Полша, Руминия, Болгария, Словакия ва Венгрия ҳукуматларига Украина қишлоқ хўжалиги маҳсулотлари билан боғлиқ мавжуд вазиятдан чиқиш йўли бўйича таклифлар берди. Бу ҳақда Еврокомиссия расмий вакили Дана Спинант 19 апрель, чоршанба куни Брюсселдаги брифингда маълум қилди.

Унинг сўзларига кўра, фон дер Ляйен ўз мурожаатида мамлакатларнинг Европа Иттифоқи бозорларига айрим турдаги қишлоқ хўжалиги маҳсулотлари импорти кўпайишидан қўрқишидан хабардор эканини таъкидлаган. Унга кўра, ягона бозор ва Европа Иттифоқи божхона иттифоқини ҳисобга олган ҳолда, бу муаммоларни ҳал қилиш учун умумевропа ёндашуви зарур. 

Еврокомиссиянинг таклифи уч қисмдан иборат. Биринчиси, беш мамлакатдаги фермерларни қўллаб-қувватлаш учун 100 миллион евро миқдоридаги янги молиявий ёрдам пакети. Иккинчиси, дон, буғдой, маккажўхори, кунгабоқар учун Европа Иттифоқи савдо қоидаларига мувофиқ превентив чоралар. Учинчиси, Европа комиссиясининг Украинадан Европа Иттифоқи бозорига кирадиган бошқа маҳсулотларга нисбатан суриштирув. 

«Бир томондан, биз Украина экспорти, шу жумладан қишлоқ хўжалиги маҳсулотлари бўйича қўллаб-қувватлашга интиламиз, чунки бу Украина иқтисодиёти учун ҳаёт йўли, биз ушбу қишлоқ хўжалиги маҳсулотларини озиқ-овқат хавфсизлиги муаммоларини ҳал қилиш учун зарур бўлган жаҳон бозорларига олиб чиқишга интиламиз. Бошқа томондан, биз фермерларимизни қўллаб-қувватлашга тўлиқ содиқмиз», деди Дана Спинант. 

Бозорнинг Украина қишлоқ хўжалиги маҳсулотлари билан тўлиб кетганлиги сабабли, Полша, Венгрия, Словакия ва Болгария бир томонлама равишда уни импорт қилишни тақиқлади. Брюсселнинг таъкидлашича, савдо қоидалари Европа Иттифоқи ваколатига киради ва биргаликда ечим топишни талаб қилмоқда.