Чехия президенти: Украинага ўқ-дорилар етарли даражада етказиб берилмаяпти

Чехия бошқа иттифоқчилар билан ҳамкорликда Украинага ўқ-дори етказиб беришни кўпайтириш йўлларини қидиради, деди президент Петр Павел Киевдан Прагага қайтгач.

Фото: Picture Alliance

Унинг сўзларига кўра, Украина қарши ҳужумга ўтишида зарур бўлган снарядларнинг кескин танқислигини бошдан кечирмоқда, дея хабар берди České Noviny. Украинага керак бўлган ўқ-дориларнинг бир қисми анъанавий равишда совет техникасини сотиб олган мамлакатларда сақланади, дея қўшимча қилди у.

“Ўқ-дориларнинг жиддий танқислиги нафақат Украинанинг самарали мудофаа қобилиятини, балки унинг муваффақиятли қарши ҳужумни ўтказиш қобилиятини ҳам маълум даражада чеклайди”, — дея Павелнинг сўзларидан иқтибос келтирган нашр.

Чехия президенти, шунингдек, иттифоқчилар Украинани самарали қуроллар, жумладан, замонавий танклар, лекин минимал миқдорда ўқ-дорилар билан таъминлаётганини таъкидлади.

Украина ҳарбийлари, унинг сўзларига кўра, техникани бир неча кунгина жойлаштириши мумкин, кейин эса уни орқага қайтариб олишлари керак. "Аслида, бу омбор захирасига айланяпти. Бундан маъно йўқ", - дея хулоса қилди Павел.