Францияда 1 май намойишлари полиция билан тўқнашувга айланиб кетди

Францияда пенсия ислоҳотига қарши норозилик намойишлари тўхтамаяпти. Камида 291 намойишчи қўлга олинган, 108 полициячи яраланган, деди ички ишлар вазири.v

Фото: Reuters

1 май, душанба куни Францияга юз минглаб намойишчилар президент Эммануэл Макрон ташаббуси билан бошланган пенсия ислоҳотига қарши намойишга чиқди. Ҳукумат маълумотларига кўра, бутун мамлакат бўйлаб намойишчиларнинг умумий сони 782 мингга етган. Касаба уюшмалари 2,3 миллион намойишчи ҳақида маълумот берди. Бир қатор шаҳарларда намойишлар полиция билан тўқнашувларга айланган. Зўравонлик ҳолатлари, хусусан, Париж, Лион ва Нантда қайд этилган, дея хабар беради dpa агентлиги.

AFP ахборот агентлиги хабарига кўра, Парижда намойишчилар полициячиларга нарсалар улоқтирган, бир қанча банк ва кўчмас мулк ойналарини синдирган, хавфсизлик кучлари эса кўздан ёш оқизувчи газ ва сув пуркагичлар билан жавоб берган.

Расмийларга кўра, Парижда бир полициячининг ёнувчи мослама отилгани оқибатида юзи ва қўллари қаттиқ куйган. Пойтахтда камида 46 киши қўлга олинган, деб хабар берди AFP.

Лионда намойишчилар камида тўртта машинага ўт қўйган, бу ерда 40 киши қўлга олинган. Нантда ҳам намойишчилар полицияга қарата нарсалар улоқтирди, ҳуқуқ-тартибот ходимлари кўздан ёш оқизувчи газ қўллади.

1 май оқшомида 291 нафар намойишчи қўлга олинган, 108 нафар полициячи яраланган, деди Франция ички ишлар вазири Жералд Дарманен.