Украина Киев узра «Кинжал» ракетаси йўқ қилинганини рад этди

Украина Қуролли кучлари Ҳарбий-ҳаво кучлари қўмондонлиги Defense Express порталининг Киев узра «Кинжал» гипертовушли ракетаси йўқ қилингани ҳақидаги маълумотини рад этди. 

«Ушбу ракета қўлланилиши эҳтимоли бор эди, аммо баллистик ракеталар қайд этилмади», деб тушунтирди Ҳарбий-ҳаво кучлари қўмондонлиги вакили Юрий Игнат «Суспільне» нашрига.

Аввалроқ Украина Ҳарбий-ҳаво кучлари қўмондонлиги Киев осмонида бошқарувни йўқотган Bayraktar учувчисиз учиш аппаратини (УУА) уриб туширганди.

«4 май соат 20:00 лар атрофида Киев вилоятида режалаштирилган парвоз вақтида Bayraktar УУА бошқарувни йўқотди. УУАнинг пойтахт осмонида назоратсиз қолиши нохуш оқибатларга олиб келиши мумкинлиги сабабли мобил ўт очиш гуруҳларидан фойдаланишга қарор қилинди. Нишон йўқ қилинди. Афсуски, бу техника ва бундай ҳолатлар рўй бермоқда. Гап техник носозлик ҳақида кетаётган бўлиши мумкин, сабаблари аниқланмоқда», — дейилади қўмондонлик хабарида.

Украина пойтахти мэри Виталий Кличконинг сўзларига кўра, Киевнинг Соломенский туманидаги тўрт қаватли савдо марказининг биринчи қаватида вайроналарнинг қулаши ёнғинга сабаб бўлган. 

Портлаш тўлқини бинонинг декоратив ташқи элементларини ва 150 квадрат метргача бўлган майдондаги ойналарни синдирди, деб ёзади Кличко. УУА бўлаклари қулаган жойда ёнғин тезда ўчирилди.